Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
قدّاش منّي ليك
Leila Njehi - ليلى نجاحيقدّاش..
قدّاش تبّعتك من بعيد..
قدّاش تمنّيت نحطّو اليد في الييد..
قداش تمنّيت نرسمك في خيالي و نحسّك..
جابولي فارس عالحصان الأبيض باش ننسى و ما نوِدّك..
ما طاوعتِش خاطر غيرك ما نريد..
قدّاش تبّعتِك في زناقي المدينة
و تخبّيت وراء السّور و نوّار الياسمينة البنينة
يا غيبة عينيك على عينيا كي نشوفك تتبسّم..
و كي تقلي مزين خدودك و انا نتحشّم..
قدّاش..
قدّاش هربت منهم باش نجيك في غرغور القايلة..
و قداش دهشو فِيّا و في دموعي السّايلة..
كي كنت نستنّاك و ما تتعدّاش قدّامي..
قدّاش تصنّت عند عمي لزهر العطّار نسمعشي اِسمك في وسط الهدارِي..
و ندهش و نضيع و ننسى لي هو البيّاع و انا الشّاري
و نجبد اسمك ما بين ياسر أسامي
و نَنْسى
ننسى علاش جيت و نلم حالي و أحوالي..
و نقول..
قدّاش منّي ليك قدّاش..
و الحب بالدّرڨة ما جاش..
ليلى نجاحي
Website Design Brisbane
Tags: