ساعات نحبك
و في الساعة ألف مرة نموت ..
و ساعات نتمناك ليا و نعرف لي الدنيا بخوت..
و ساعة على ساعة ف أحلامي نهرب بيك و السما السابعة نفوت..
نفيق على غفلة ! ..

و يبقى خيالك في القلب منحوت..
و ساعات نشوفك قدامي و في لحظة تتصنصر خيوط..

و ساعات انت شفى قهرة
و ساعات انت وجيعة غدرة و سهرة
للصباح مع خيال سفاح
قتال أرواح .. يبعدك عليا  و الطقس يتقلب أرياح..
و ساعات انت سكتة في جواجي شاعلة جمرة ..
و ساعات انت شجرة ذابلة شاحبة متوحشة مطرة ..

و ساعات انت شقاوة صبية ذايقة الحرية..
و انت بير غارق مليان حنية ..
و سهوة عازب في وجه الصبحية !  

ساعات نتفكرك بالشهقة
و ساعات نتفكرك بستيلو و ورقة
و ساعات نتفكرك قدامهم أما بالسرقة
مرة ببسمت حب مرة ببسمة نقمة
و ساعة على ساعة تجيني منك مطرة و صعقة

و ساعات نحبك و في الساعة ألف مرة نموت
و ساعات نتمناك ليا و نعرف لي الدنيا بخوت..

نحبك و نتمناك ليا
يا جنينة خضرة في الشتا مندية
نحبك يا ورد و زهر فاوح في الصبحية
يا عشق مني و فيا
يا شمس يا قمرة يا ضو عينيا
نحبك ..
و ساعات نشوف فيك نااسي
تحبني تزهيني و تعمرلي راسي
ساعات إنت تكوتي في نعاسي
أما  !!! ساعات تعيشني بآسي
تذوقني الويل في كاس  نحاسي
إنت عسري و أحباسي
المر و معكر أنفاسي
أنت ... لي فجرت ساسي..
و ساعات نحبك و في الساعة ألف مرة نموت ..
و ساعات نتمناك ليا و نعرف لي الدنيا بخوت ..
و ساعات ساعاتي حياة و في اللخر تطفى و تفوت ..