حبيت نهار ننسى مشاكلي ونخرج ملعالم لي كلو فوظا وغموض و هم ومشاكل وإلى أخ ... كيما العادة شاورت دارنا وخرجت ... حطيت الكيت وخليت شوية فن أصيل قعت ماشية حتى خلط لمحطة لكار , محبيتش ناخو تاكسي على خاطر انا نحب اليوم يكون مش كما أي يوم ستنيت مدة وباقي لكار مجاتش ، لمحطة ولات ياسر مليانة ، ياسر وجوه فيها لفرحان وفيها لحزين فيها ليضحك ضحكة صفرة وفيها لضحكتو من قلبو و لحسلو برشا أقنعة ..

تلفت نلقا الكار جات حظرت روحي وطلعت , مشيت بجنب شباك , قعت لين نوصل لهاكي البلاصة إلي في بالي ،حوما عربي و ناس ليفيها الكل على قدهم قربت نوصل هزيت روحي وقدمت وانا هك جات في مخي فكرة كيفاش نجم ندخل الديار لي في هاكي الحومة ونتقرب من ناسها ونحاول نعاونهم حتى بالكلمة طيبة ، قررت باش نعمل في روحي صحافية وندق على كل باب وبطبيعة هما مش يستقبلني وإذا لزم بتزغريت

وصلت ,  تقدمت بخطوات ثابتة ، برشة قالولي مش متاعك أما مع ذلك شديت صحيح وتوكلت على ربي .

تمشيت شويا وحبيت نتعرف على شوارع هل حومة ، تحسها قديمة ياسر الحيطان كان جاو ينطقوا راو قالو أمان يزيوني مكليت على راسي استرني غطيني راني برت ,

حس صريخ لولاد صغار وهما يلعبو مالي الحومة ومونس ناسها  , ريحت الماكلة التونسية مالية الحومة  ...

حسيلو محبيتش نطول دقيت على أول باب عرضني :

- عسلامة مدام .

-عسلامة بنتي تفضل نجم نعاونك بحاجة ؟

-أيه ، أنا صحافية جيت اليوم باش  نسمع مشاكلكم و نحاول نعاونكم بلي نجم .

-مرحبا بيك بنتي تفضل أدخل زارتنا البركة جيتك عزيزة وغالية .

-عيشك يا حاجة نشالله حجة .

- تفضل بنتي نقدملك صغاري هاذي بنتي مريم عام جاي باك وهذا ولدي محمد مازال يقرا 5 إبتدائي وراجلي كما تشوف مرمي في فرش مريض ونشالله ربي يشفيه ،،، أيا مريم قوم حضر براد تاي وجيبلنا كعبات البقلاوة لي فالحكة زرقة أيا يعيشلي بنتي نشالله نفرح بيك .

-علاه تعبو في رواحكم .

-بالعكس بنتي والله جيتك عزيزة احنا هوني منسيين لا حد يجينا ولا حد يسال علينا نهار كامل بين 4 حيوط نخرج نمشي نجيب شويا فلوس باش نعيش صغاري ونشري دوى راجلي ونرجع

هوني .

* تفضل تاتا نشالله يعجبك .

-يعيش مريومة نشالله فرحتك .

* صحة وبشفة.

-مدام تفضل احكيلي همك فرغلي قلبك حسيتك تتوجع من غير صوت .

-اه يا بنيتي الواحد ديمة يقول حمدلله على كل حال انا نخدم عند مرا كي نستحق تعتني يرحم والديها عندي ها زوز نورات ولابس عليهم شتحبني نقول على هاذي نعمة أما لفقر هد ودمر

برشة عيلات برشة نورات صغار قاعد يقتل فناس نهار بعد نهار ديار الحومة الكل مهدودين ناس مطيشة البرا , الفقر أثرْ على لَمّةَ تونسية عباد تموت مالقاتش باش داوي روحها , ولاد صغار يتحرمو من طوفلتهم علاه هاكا علاه صغار يخرجو لشارع ويبيعو فالعلكة والمناديل باش يلقاو مياكلوا ، مطيشين فشوارع كزبلة كل ليل يجيو تحت  الحيت ويرقدو , نظراتهم حزينة ووجوهم باينة

عن المعاناة لي يعيشو فيها , كبار تنتحر خاطر حياتها عذاب , ناس تموت بجوع وناس تلمد لقمتها مزبلة قول حيوان هو ,, الحيوان تلقاه كي ياكل بالوهرة , وليدات صغار يبكيو الحجر ...

قالوا مش يلقاو حل لمشاكل الفقر , تي شعملو بربي ! يحسابو الحكاية تستنا !

تي في كل دقيقة يموت إنسان في كل ثانية يتوجع ألف مسكين كل لحظة ملايين دمعات تهبط  , علاه لهاذي درجة دمعتهم رخيصة ؟ راهي أغلى منكم ومن مشاريعكم تعديوها عرك وسبان وناسين يلي ميدوم شي كان فعلك ,, لوضع عمايل يزيد ناس متعرفش رحمة ولا حتى شقال ربي كل حد يفكر في روحو وكيفاش مش يعمل هاكي وهاكي ونساو إنو فما ناس حتى الحلم ممنوع عليهم ,  مايفكر حد في خوه علاش تي حتى الإسلام إهتم بمشاكل لفقر .

ولله حرام عليهم مساكن نهار اخر ,, قلبي دم عليهم انا مشاكلي قدام ها ناس حتى شي يعني حمدلله وسامحني بنتي خذيت من وقتك أما الكلام خرج وحدو ..

( فهاكي لحظة لحمي قشعر وحسيت بوجيعة ونسيت مشاكلي لكل وتمنيت كان جيت نجم نعمل حاجة نفرح بها ناس ونشالله تو نعمل خاطر حتى الكلمة طيبة عمل خيري وبأجرو  )

- لا بالعكس محلاها قعيدة أما وقيّت باش نروح نشالله نجي مرة أخرى ونجيب معايا خبير باهي وربي يفرحك بيهم ويشدك بصحة بدنك ونشالله ربي يشفي راجلك.

- يعيش بنتي أيا ليلتك زينة ورد بالك على روحك .

خرجت ومخي سارح لين وصلت لدار رميت راسي علمخدة و رقت .

ربي صبر كل فقير ، ربي صبر كل مريض ونشالله ربي يشفيه ,  وربي ماينسى حد نشالله لِتحرم من حاجة في دنيا يلقاها في جنة

ربي صبر كل فقير ، ربي صبر كل مريض ونشالله ربي يشفيه ,  وربي ماينسى حد نشالله لِتحرم من حاجة في دنيا يلقاها في جنة