Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
ريمة
Amir Oueslati - أمير الوسلاتييا غْزَيِّلْ في البرِّيمَة
عَڨْرُوا مِ الرِّيمْ رِيمَة
كْحُلْهَا سَبْلَة تِتْسَبْسِبْ
ظَنِّيتْهَا جْرَاحْ غِيمَة
النَّوْ تْنَوَّحْ
و الدَّمِعْ السَّايِلْ يِتْبَخْتِرْ
سَايِلْ مِنْ ضَحْكِةْ رِيمَة
*
يا غزَيِّلْ فِي السَّمَا يِتْعَلَّى
الخَلْڨْ تْوَطِّيهْ لِمذَلَّة
و اِنْتَ حَابِبْ عَ النُّجُومْ تِتْرَبِّبْ
يَا حَابِبْ اِتْكَفِّنْ بِمْظَلَّة
العُيُونْ السُّودْ تْذَبْذِبْ
خِلْتْ النَّجِمْ يِنْدِبْ ضِيمَهْ
الشُّهُبْ تْشَهِّدْ تِتْنَهِّدْ
و اللِّيعَة السَّايْلَة تِتْبَخْتِرْ
سَايْلَة مِنْ ضَحْكِةْ رِيمَة
*
يَا غزَيِّلْ لاَ تْبَيِّنْ لاَ تْزَيِّنْ
ڨَرْنِكْ ڨَالْ عْلِيكْ حْنَيِّنْ
و لَوْ رَبِّكْ ڨَالْ حْنَيِّنْ
اَشْ تْرِيدْ مِنْ أَقْرَانْ تِتْسَبِّبْ
مَيِّلْ البَصَرْ غُضُّو
ڨَمْرتِينْ فِي عِينِيكْ تْعَضُّو
عَدِّلْ الڨَلْبْ نَفْضُو
اَشْ تْرِيدْ وِ الوَرِيدْ شْبَيِّبْ
حْسِبْتْ حِيرْتِي تِتْعَيِّبْ
خْدُودْهَا حَمْرَا تْلَبْلِبْ
و الدَّمْ السَّايِلْ يِتْبَخْتِرْ
سَايِلْ مِنْ ضَحْكِةْ رِيمَة
*
يا غزَيِّلْ شَعِّلْ السَّعَفْ و عُودَهْ
مَكْتُوبْ العَذَابْ عَ النَّخَلْ يِتْعَوْدَهْ
خِلْتْ الحَرْڨَة تِكْوِيهَا يَا وِيلْهَا
رِيحِي مَاتِتْ لاَ اِطَّفِي لاَ تْهَبْهِبْ
الحْرِيڨَة اِدَّفِّيهَا تْلَهِّبْ
و النَّارْ السَّايْلَة تِتْبَخْتِرْ
سَايْلَة مِنْ ضَحْكِةْ رِيمَة
*
يَا غْزَيِّلْ شَيِّدْ خُطْبِتْهَا
طُبْ كل طَبَّة طَبِّتْهَا
عَارِفْ مِ الخُطْوَة خُطْوتْها
ظْوَافِرْ تْخَبِّشْ تِتْخَبِّطْ
حْوَافِرْ اِتْهَزّْتْ اِتْحَطِّتْ
بَانِتْ اِطَّبْطِبْ جْرَاحِي
زَادِتْ نَدْبَاتْ لْنَدْبَاتِي
و الجُّرْحْ السَّايِلْ يِتْبَخْتِرْ
سَايِلْ مِنْ ضَحْكِةْ رِيمَة
*
يَا غزَيِّلْ فِ ثْنَايَا تِتْسَرْسِبْ
الطِّينْ حْجَارَة تِتْرَسِّبْ
تْڨِيسْ لْمَشْيِتْهَا و تْكَيِّسْ
حَصْحَاصْ عَايِڨْهَا يِتْكَدِّسْ
اِكْدِسْ عَاتِڨْهَا مِنْ حْفَاهَا
خَافْ قْفَاهُمْ فِي قْفَاهَا
و التعَبْ السَّايِلْ يِتْبَخْتِرْ
سَايِلْ مِنْ ضَحْكِةْ رِيمَة
*
يَا غْزَيِّلْ وُسْطْ العَاشِڨِينْ مَعْشُوڨْ
رُصْ الصَّلِيبْ نْهَايِتِكْ مَشْنُوڨْ
الجَرِيدْ حَيْ فِي الصَّحَارِي البِيدْ
يِمُوتْ النَّبِيْ يِصْبَحْ شَهِيدْ
يَا مِيتْ رْمَادْ يَا طِيرْ الفِنِيڨْ
فِيڨْ ڨْدَا الرَّفِيڨْ لْفُوڨْ
رِيمَة صَلِّتْ بالدَّرَاوِيشْ شْفَاعَة
دَوْزِنِكْ مِيزَانْهَا مِ الجَحِيمْ مَنَّاعَة
رَضِّتْ خَاطْرِكْ لِمْرَضْرِضْ
عَ خَاطْرِكْ رْضَاتْ تِتْمَرِّضْ
فَاتْ الفُوتْ مَاتْ غْزَالِكْ
يَا غْزَيِّلْ في البرِّيمَة
المُوتْ عَڨْرِكْ مِنْ رِيمَة
و المُوتْ السَّايِلْ يِتْمَايِلْ
سَايِلْ مِنْ ضَحْكِتِكْ يَا غْزَيِّلْ
أمير الوسلاتي
Website Design Brisbane
Tags: