Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
توتة
Amir Oueslati - أمير الوسلاتي(1)
تَحتْ العِنْبَة .. تُوتَة تِتْرَشِّفْ في النَّعْناعْ
صُنَّاعْ القهوة فِينْ نْحُطِّكْ يا طْبَقْ الوَرْدْ
جَرْدْ مِثَالْ أَما هِيَ بِالمِنْجَدْ نَرْدْ
أرْبعَة وْجوهْ للجَمالْ .. وَرْدْ و زْمُرِّدْ
و شَمْعَة في الخْدودْ تْغَرِّدْ .. و دَمْعَة
دَبِّتْ الرُّوحْ في الصُّمْعَة
تْسَكْرِتْ دْكاكينْ النْحاسْ و الرّحَى و المِهْراسْ
و صْبابيطْ جْحَا و زينة الأعْراسْ و العْلاَڨَة
كلْ تِرْكينة فيها صَنْعَة
يا أخْيارْ النَّاسْ مِن تُجَّار و سَوَّاڨَة ..
حَضْرِتْ صْلاة الجِّمْعَة
لْبِسْتْ الجِبَّة و كَثِّرْتْ خيرْ أَعْمامي
زاروني بالمَهْبَة من تَسْتورْ
غاصْ بريحة المالوف حَد الرَّڨبَة
تڨول جَلال الدين الرّومي وَلاَّ سيدنا الفاضِلْ بِنْ عاشورْ
طافْ بِيا الخُطّافْ ..
اللّي مْڨَرْبْطَة و اللّي مَدْهونَة .. بان دروج الزّيتونة
حْجَرْ أكْبِرْ مِنّي عْمُرْ و قْدَرْ .. و حْمامْ القُبَّة يْطُلْ
يْنادي : " سيدي الإمام وْصِلْ "
المْطَرْ تِتْراڨِصْ ما بين كِمْلِتْ الخُطْبَة والرَّكْعَة
صْحَنْ الجَامِعْ شابِعْ بالغَيْثْ النّافعْ
تِشْتهي تْكونْ فِي لَحْظِتْها حوتَة
تْفَكِّرْتْ العِنْبَة .. تْفَكّرتْ التُّوتَة
ريحة العَنْبِرْ تْبَخِّرْ مِنَّا
و مِتْحَجْبَة في العِشْرينْ على غَفْلَة تِتْبَخْتِرْ مِنَّا
تْفَوَّحْ بالنَّدْ سُنَّة و تْحَيِّيني بْيِدْ فيها حِنَّة
سبحان الموْلى حِلْم خيالي تْجَلَّى
ڨالِتْلي حْليلِتْها عَدِّتْ ليلِتْها بْعِلَّة
ڨْليبْها يِتْجَمِّرْ لا طَفَّاهْ مَااا بِير و لاَ ڨُلَّة
يَا شيخْ أَمِيرْ .. أنا التُّوتَة بيكْ نِتْڨَلَّى
(2)
رْبَطْ القَصْبَة هايِجْ و مايِجْ كِ ياجوجْ و ماجوجْ
طُزِّينَة في حَضْبَة من واشْ و أرْبعينْ رَڨْبَة
شارينْ بايعينْ في خْبَرْ الخُطْبَة .. الحاضِرْ يِبَلَّغْ اللّي ما جوشْ
عَمْ خْويلِدْ جاهْ لِلْبِكْرْ عْريسْ بْجاهْ و صْويرِدْ و لْويزْ
إيدي داخِتْ تْفَرْڨِتْ مِ الكاغِطْ حَلْوى المولِدْ
بينْ الزّْناڨي لَفِّيتْ جِبْتي في مَخْلَى
و جِبْتها على ساڨي نِجري .. كابّوسي طاحْ في دَخْلَة
تْسَمِّرتْ تَحْت الشُّبّاكْ رافَعْ راسي شامِخْ كِالنَّخْلَة
كل ليلة فْ ها البْلَيْصَة دايخْ عَشَّاڨْ
و اللّيلة من ضيڨْ التَّنْفيسَة شَهَّاڨْ
يا تُوتَة .. يا تُوتَة حِلِّي طُلِّي دِلِّي المَغْبون لوطَة
لَهَّاكْ بِشْناشِنْ ذْهَبْ الڨَلْبْ لو نْحاسْ عندْ العَجَّانْ مُرْجانْ و ياقوتَة
طْفاتْ نارْ الفْنارَة ضْواتْ شَمعتين في العين مَحْطوطَة
و صْوَيِّتْ مَكْلومْ بَكَّى النجومْ من بابْ بْناتْ لْبابْ مْنارَة
" سيدي حَنَّى .. حْنَيْناتْ البَرَّاني ما تْدومْ
بابا خْويلِدْ بايَعْني لِلِّي يْسُومْ
صُومْ عْلِيَّا يومْ كَفَّارَة و يومْ اِسإلْ البْشارَة
رَتِّلْ الفاتْحَة و شَهِّدْ الجارْ و الجارَة
ڨُدَّام الدّين إشْهارْ و ڨُدّامْ قْوانين البايْ مَسْتورَة "
التُّوتَة تْفَتْحِتْ مَسْرُورَة .. تْكِتْبِتْ عْرُوسَة لْأَمّورَة ...
(3)
يَا بَابَا رُدْ عَ الطَّلاَّبَة البابْ
مَهْما الڨَلْبْ مَغْلوبْ ديما الڨَلْبْ غَلاَّبْ
خْلِفْتْ بْوَعْدِي يَامَّا
جِسِّي صُبْحيتي عَذْرَاا بِبْكَارَة
بْلاْ ما تْمِسِّي مِنْ ثَمَّة
اللِّڨْشَة المَلْڨُوشَة تْبانْ بْغَزْرَة
يا حَسْرَة عْلى السُّلْطانْ الحَفْصي
راحْ زْمانْ الغَصْرَة و الحْزارَة
سيدي أَميرْ تاجْ الرّْوَيِّسْ .. جَنَّانْ قْطَفْ الوَرْدَة
ْ يا بَّيْ لوْ يَبْدَى العْريسْ بَايْ
لا نَرْضَى بْعُمْدَة وْ لا رَيِّسْ
شَڨِّيتْ جَرَّة مْكَفْنَة تَحْتْ سْريري
يَامَا شْڨيتْ بْسَدَّايَة نْتَبَّعْ بالغُرْزَة جُرِّةْ دْنَانِيرِي
و عاوِنْتْ الشَّايِبْ نْبيعْ حْليبْ المِعْزَة رايِبْ و ڨُوتَة
أنْدادي يْنادو بِيَا " تُوتَة مْرَاا حُرَّة مِڨْدِيَّة "
طْويتْ مَلْياتي في ڨْفافي و عَلِّڨْتْ خُمْسَة في السُرَّة
و نْويتْ بْمِيَّاتي نِكْسي حافي يِكْسيني ثْوابْ حَجَّة
شْبَحْتْ سيدي في فَجَّة
يا رَبّي عَمِّلْنا عليكْ اِثْنَيْناتْنا في الهَجَّة
(4)
تْفِرْشِتْ تُوتَة عْلى مْحَرْمَة
حَلِّتْلِي أبوابْ جْنينَة مْحَرّْمَة
ثَمْراتْ عْوينَة حَمْرَا
السُّلْطانْ ذايِبْ فِي أغْصانْ الكَرْمَة
و شيطاني تايِبْ مِن رَمْي الجَمْراتْ
شَمِّرْتْ و رْميتْ الجَمْرَة كِ عَرَّاتْ
سْعَفْ النَّخْلاتْ تْرِفْ
تْلَمِّتْ نَحْلاتْ شْفايْفي تْرَفْرِفْ
تْلَمِّدْ شْهَدْهَا.. شَدِّيتها تَخْميسْ عْلى ڨَدْهَا
خُمْسَة مَوْشْمَة بْيِدْهَا و بُوسِةْ خَالْ فِي نْهَدْهَا
نَسْبَحْ مِتْخَمِّرْ في فَقْراتْ ظْهَرْها نْعِدْهَا
تْلاثَة و تْلاثينْ عْلى عْدَدْ حَبَّاتْ السِّبْحَة عْدَدْها
نْسَبِّحْ .. تَغْدِرْني السَّكْرَة بالتَّخْميرَة
نْهَتْري بالشِّلْحَة مِنْ شيرَة و نُوبِةْ الحَضْرَة مِنْ شيرَة
حَـــــــــــــــــــــيييييْ
(5)
بَنُّوتَة مْڨابْلَة لِلْڨابْلَة
يا سِيدْ أميرْ بْشارَة بِخْسارَة
المُوتَة نادِتْ تُوتَة فِي وْلاَدِةْ سارَّة
...
سَرُّورْ ... في كُلْ أعْيادْها ضْميدَة
فْ إِيدَيَّاتْها حَارِڨْها شْحُورْ
أَنْدادْها الضّْفيرَة مَڨْدُودَة
تْڨُلِّي نْحِبْ " ثَعْرِي " اللّيلَة " مَذْفورْ "
نْجاوِبها " يَعْطيكْ دودَة " مرَّة
و بْقِلِّةْ حِيلَة مَرَّاتْ
بْنَيْتِي زِينِةْ العِيلَة الكَتْكوتَة
شَعْرِكْ حْريرْ مِتْحَرِّرْ خِيرْ
كِالأَمِيراتْ .. كِالغَجَرِيَاتْ .. كِ تُوتَة
...
دْوِيرِةْ لُمِّيمَة في الدُّورَة بينْ شارْعينْ
عاشِتْ مَحْرومَة مِنْها بعدْ العِشْرينْ
كِبْرِتْ بْنَيْتي بْغُصَّة
عْلى قِصِّةْ شَجْرَة كِتْبِتْلي مِيمِتْها
بِرْكِتْ تَحْت الغُصْنَة
صُورَة نَسِّتْني مِيتِتْها
في نَفْس الحَارَة .. نَفْس القَهْوَة بْ صُنَّاعْ
تَحْت العِنْبَة .. سارَّة تِتْرَشِّفْ في النَّعْناعْ
(6)
سارَّة تِتْرَشِّفْ في النَّعْناعْ
بَيّاعْ الكْليلْ كْدِسْ يْحاذيها عَ الكْليمْ
شيباني عْزيزْ عْليها مْقَوِّسْ كِ عِرْوِةْ كاسو
يْدِسْ في وْذانيها كْليمَة تْحِسُّوو
عبد العزيز العِرْوي بْكَبُّوسُوو
يْراضيها بْسَلَّة من ماضيها
تْراضيهْ بْدَمْعَة خَلْطِتْها تَبْسيمَة
***
نِتْجَمِّلْ بِوْريدَة فُلَّة
و نِتْسَلِّلْ وْحيدَة في فَلَّة نِتْسَلَّى
و اِتْعَدَّى ...
هَلِّلْ خُلْخالي بوفَرْدَة يوطى يِتْعَلَّى
يا بَّيْ .. حَبِّيتْ صْبَيْ
ريحة تُوتَة فيه تِتْجَلَّى
و اِتْعَدَّى ...
حْبَيِّبْ في الظَّلْمَة ضَيْ
راوي جوفي رَيْ
و اِتْعَدَّى ...
يِكَرْكِرْ في جِبَّة صوفي
يا عيني شوفي ڨليبي شْبَيِّبْ حَيْ
و اِتْعَدَّى ...
خالِق مِلَّة يِتْعَبِّدْ
صَحَّة لِلْخالِقْ هَا العَبِدْ
(7)
ثِبْتِتْ عْوِيناتْها تْثَبِّتْ
دَبِّتْ فِيَّا رَعْشَة تِتْلَبِّدْ
نِبْتِتْ في جْوَاجِيَّ عِرْشِةْ حُبْ
بْريحِةْ نَعْناعْ و تُوتْ و عْنِبْ
مَيِّلْتْ الشَّاشِيَة طاحِتْ في السَّاحَة
فَاحِتْ ضَحْكِتْها بِفْيَانَة كِ بْلاَحِتْ
ڨَادِتْني لِلْجَبَّانَة رَتِّلْنَا على تُوتَة الفَاتْحَة
وَلِّينَا لِلْعَمْ أَمِيرْ قْرينا فاتِحْةْ الخِيرْ
سَرُّورْ تْفَتْحِتْ مَسْرورَة
عْرُوسَة بْنَيِّةْ تُوتَة و أَمُّورَة
حَلِّڨْنا سَبْعَة أيَّامْ و سَبْعَة لْيالي
تَمِّتْ سَبْعَة نْصُوصْ حْلِڨْ خَيَّالِي
و تُوتَه تُوتَه ... خِلْصِتْ الحَدُّوتَة
أمير الوسلاتي
Website Design Brisbane
Tags: