خانتك مرة الحروف و ضحكت لين هبطت دموعك وقلت فرحان وشدتك غصة وحكيت برشابرشا وبزربة لين معاش تسمع في روحك  وحطيت برشا الوان باش تخبي لونك وكذبت لين نسيت الحقيقة والوجوه الى تلبس فاها كثرت عليك ووجهك مش مواتيك وفي لحظة ماقبل هروبك مالدنيا تحط راسك عالمخدة وتصارح روحك وتضحك لين تغرق في دموعك وكى ماتلقاش النفس تقلهم مريضة تو نرتاح قوية مايتخافش عليا...صحيح قوية عمرك ماهزك وجود والا غياب الناس مشكلتك مع روحك توا سنين ماتفاهمتوش معذبتك فيك اثنين تلاثة الف الفين فيك حرب وكل ماتحكى يحسدوك انت الى تنسى برشااا وماتحبش بالساهل وتتجاوز في لحظة ...

ايجا نبدلوا خلونى نحب ونتجرح ويخنونى الناس وخوذونى منى مااصبعها انك تخون روحك تجرحها تعبها تعيشها الف شعور ... ويقولولى محلى ضحكتك مالقلب تضحك كالصغار تعيش كل يوم ويوموا ماقواك محلاك نهواك .... وانا نتبسم وبين  بين روحى نسال فاها يحكى معايا ؟ يحكى عليك؟ تي قول انطق قلهم لا اذيكا مش انا اذيكا فنانة كتبتلها حكاية وتمثل فاها... اما كى يسالونى انت شكون اش باش نقول ...ايا فك علينا لواه الفلسفة وهالحكايات ... عيش كالبنات... حياتك ايامات... خليك محلاك مقواك الى يراك يهواك هكة ربي ظهرك بين الناس ... الى بينك وبين روحك خليه ليك احكيه للمولى يرأف بيك هو وحدوا يرضيك يرحم ضعفك ويسعد قلبك
وكان خانتك الحروف هو يعلم الى في قلبك وكان خانتك الدموع ابكى ياروحى بين يديه يجى نهار وتحب روحك وتحملها قبل ماترقد وكى يقلولك محلاك ومقواك تقول لروحك نهواك .