ي نعم خلاها .. خلاها.. و قيد على الظروف .. محسوب شكون باش يلومو ؟! شكون ينجم يلومو .. حد .. حد ما باش يتدخل و حد ما ينجم يتدخل و حد ماهو معدل جملا ..

خلاها و حكايتهم عندو ضهرت فاللخر حكاية تافهة كيف ما قال .. خلاها في نص الطريق لا عارفا لا علاش ولا كفاش ولا شصار !! خلاها بعد الوعود وهاك الكلام و الحلفان الي قالو كل ..

خلاها بعد الحب و الصبر و السهر ليالي و التخمام و ثلاث نقاط من خيبة الامل او بالحرى ثلاث قرون خيبة .. خيبتها هي نقصد . أكيد هو معندوش حتى صلة بالموضوع  ..

خلاها بعد ما عشقت صوتو و كلامو .. عشقاتو هو .. خلاها ظايعة .. حايرة ..هايمة .. مش فاهما شفما .. علاش خلاها ؟

خلاها بعد ليالي الحب و هاك التليفونات و الميساجات و وووو و ..

خلاها بعد ما حبت حاجات عمرها متصورت روحها نهار باش تحبهم .. خلها بعد ما ولات تشوف الدنيا بعينيه ..

خلاها و مشى ماحولش حتى يفهمها شصار .. ضلمها .. خلاها بعد ما طفاها ايمات باش يحضر روحو للنهاية و مخللهاش هي تحضر روحها .. كيف قرات ميساجو بكات .. صاحت .. تنهدت .. و كتبتلو قتلو لا متخلينيش يا هم نحبك..

حاولت تبعث المساج منجمتش .. خرجت .. عاودت دخلت لقاتو بلوكاها .. مخللهاش الفرصة حتى باش تلومو حتى إنها تبكي .. هو هاك إلي خلاها تعشقو .. هو إلي خلاها تمن بلي عمرو لا باش يخلاها ..

خلاها تحس بلي هو سوبر مان .. صدقت حكايت لوم بارفات و نسات ..نسات إلي تعذبتو قبل .. نسات و طارت معاه بعيد .. بعدت على الواقع .. و عاشت معاه الاوهام ..و جاها النهار إلي نحالها الجوانح إلي صنعهملها و طاحت مالسما من فوق .. تكسرت كرايمها

..
محولتش تطلبو عل‘برتابل و لا حتى تبعثلو مساج .. وعلاه تتطلب فيه و هو إلي بلوكاها .. هو خسر على حكايتهم مساج و بلوكاج و هي مش لاس تخسر شي .. سوف كو دمعات هبتطهم و ندمت

..
قامت الصباح و لبست ضحكتها .. و من نهارتها ماعودتش بكات .. سعات تتفكر و تتحسر و تضحك .. تضحك على روحها .. وعليه .. هي حباتو بمخها و هو منتصورش بلي عمل إفور و حاول حتى حبها .. هي ولات بدن بلا قلب و هو ؟ هو من قبل بلا قلب شنو الجديد معناها ؟

!
منعرش في حكايتهم شكون المظلوم .. هي خاطر خلاها في نص الطريق هايمة ؟ وإلا هو خاطر مبكتش عليه و معطتش لغيابو قيمة ؟ آما تعرفو الحب هو المضلوم خاطرها معاش تمن بيه