Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

تخبلت..

chaos-sentimentsDalel Nasri - دلال النصري

تخبلت..

التصويرة قدامي مدغشدشة..

و انا باقي فادة و مغششة..

خيوطي مست في بعضها

الأبيض كحال و الأكحل بياض

و انا نجري و ندور نلوج عالرياض..
شيء... ما فماش..

لا يتشرى بالفلوس و لا يتباع بلاش

عروق مخي تزنزن..

كل عرق بموالو يدندن..

كلاني الحس..

خيوطي في بعضها ولات تمس..

و بدات الجوجمة تزيد و تزيد و تكبر

و خوفي بيا لبعيد يبحر..

دوسياتي دخلت بعضها..

نحب شكون يروشكني و ينظمني

نحب شكون يعنقني و يطمني..

نحب شكون يفورماتيلي الsysteme

و يعملي mise à jour متاع الأيام

و يقلي ازدم و ديما نحبك لقدام...

تشربكت أفكاري..

و ليلي خذا بلاصة نهاري..

و تخنقت في دار ما هياش داري..

نحب نعمل في راسي شقوق..

بش يدخل النفس لعروقي..

و نقول لروحي فيقي..

أطلع و جنح للسما لفوق..

قطع خيوطك و فك العقد..

خوذ كبة جديدة و إنسج لين تفد..

إنت القوة بيدها..

ماكش أي حد

و الصوف ما يتباعش بالرزانة

و التخمام يزيد وسط الزنزانة..

و البابونج ما يرقدش..

و كأس واحد ما يسكرش..

و الوحدة كيف تلقى روحك تحكي وحدك

تحكي للسكات

علي بعد ما حيا..مات

تحس روحك تكشكش. ..

كيف الكربوشة الي تشتش

و يمين البكوش في صدرو

طوال و الا قصار عمرو

دلال النصري
تخبلت..
Tags:

Vous pouvez lire aussi