نتمنى لو كان جيت في وقت الرسائل لي عالشباك تترمى ..
و الورود لي قدام البيبان تتلقى ..
و الحب المزيان و الحشمة لي تنور خدود الرمان ..
حب للة و سيدي و حب محلاه سفساريك يالي سكنت قليبي ..

حب القدر و الدلال و العينين لي تذبال ..
حب تحت الزيتونة لي كي ليدين تتمس تشعل الدنيا طابونة ..
حب نظيف خفيف و يعمل ستة و ستين كيف ..
موش حب اخر الزمان لي تشوفو تقول هذا فارس الاحلام ..

تمنيت جيت في وقت حب عزيزي لي يڨرن حواجبو على ميمة خاطر صبحت على جارنا الجديدي ..
تمنيت نعيش قصة حب كيف كاكا موش حب قلة التربية و الركاكة ..
تصور كان جينا كيف ناس قبل تجيني مع وقيت بدو عرس بنت خالتك سمر ..
تجيني تحت الشباك و تبدا تقلي محلاك يا طفلة محلاك ..

اما يقص علينا الكاليس الفرحة ماشي في بالنا بويا ولا خويا روحوا مالسهرة ..
تهرب تجري هازز اكا السروال العربي و انا نضحك عليك و نغزرلك بحرارة قلبي و كنيني ..
نبقى نغزر للنجوم و السماء و ماهي رافعتني حتى وطى ..
تمنيت نعيش قصة حب كيف كاكا موش حب قلة التربية و الركاكة ....

أميمة بالحاج