كملت الاربعة كيسان لولين .. اما شي مخي اكسح مالشراب .. محبش يدخل بعضو و ينسى .. محبش يطيح من خشمو و يركح .. زدت حارة فماش ما تنفع .. اما شي .. كل شي في بدني تفرعس كان مخي .. معدتي تقلبت .. قلبي ولا في الالف يضرب ..

اما مخي حاطط قدامو نفاق و الكذب تع العباد و يعذبلي في روحي .. يحب يحرقني يحب يدمرني يحب يبعدني على دنيا اعطيه يرتاح و كهو .. اما انا منيش ساكتتلو .. ڨرمشتلو كعبة اكستا .. خلي يجن و يهبل و يخرج مني .. خلي يطير من بلاصتو ..

اما والله شي .. نحس في روحي حرب كبيرة قلبي و مخي و بقية بدني يتعاركو لداخل ماكلين بعضهم .. و انا قاعدة عينيا طايحة و متحملة .. بكيت مالوجيعة .. ياخي حسيت كل شي ركح .. كان عينيا لي تهبط في مطر .. مخي سكت و خرج وقف قدامي عالطاولة و عطاني كف .. كف قوي دورلي خواطري .. و قلي تحملت كل انواع البشر و منجمتش تتحمل بدنك و تفرعيستو .. تحملت تخبي فينا القهر اما كي نحبو نثورو تولي ضعيفة .. و زاد قلي يا ابيض يا اكحل معادش فما تحمل .. و مشى و خلاني حالة فمي و عينيا تسقطر و القلب وقف و هز الراية البيضة ......