Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149
ڨْلِيبْهَا عَاشِڨْ الغِيرْ
Amir Oueslati - أمير الوسلاتيعْوِينَاتِي زُوزْ غْزَالْ ** شَارْدَة لَعْوِينَاتْهَا البِيدْ
بَادْيَة البَادْيَة مْلَيْلَة ** شْوَافِرْهَا سُودْ عْبِيدْ
كْثَارْ مْجَانِينْ لَيْلَى ** وْ فَرَّادِي بِيتْ الڨَصِيدْ
بِينْ الرِّيمْ غْزَيْلَة ** عَاشِڨْ فِيهَا الصِّيدْ
***
رْشَامْ أَبَارِي النَّحْلَة ** وْشَامْ لْمُولاَةْ الإِمَارَة
مْكَحْلَة وِ حْوَاجِبْ كَحْلَة ** مَڨْرُونَة تْشَهِّرْهَا ڨْمَارَة
مُكْحْلَة غَزْرِةْ الفَحْلَة ** مَڨْرُونْ مْرَصِّصْ عْمَارَة
تِنْفِي بِالرَّشْ مْرَحْلَة ** كِ طْلاَڨْ الفَلاَّڨْ لِاسْتِعْمَارَهْ
***
نِتْصَنَّعْ بِالشَّهْڨَة نْوِيحْ ** حَتَّاشْ الحِسْ يْرِيحْ
مْكَبِّشْ فِيَّا تْكَحْكِيحْ ** لِڨْرَاجِمْ ضَارِبْهَا القِيحْ
تْمِيحْ سْبُولِتْهَا بِالرِّيحْ ** بِينْ سِدْرَاتْ الشِّيحْ
دَاوِتْ سَبْعَة مْجَارِيحْ ** وْ جُرْحِي مَابَاشِ يْشِيحْ
***
حَارِمْ ڨْوَالْ حَمَّهْ ** حْلاَ لِلْعِينْ مَا حَرْمَهْ
شْعَرْهَا بِالمَحَارِمْ لَمَّهْ ** حْلاَوِةْ الزِّينْ بِمْحَرْمَة
لِضْنَى تْسِمَّهْ الحُمَّى ** يْصُحْ ڨْدَاهَا زَيْ اٌمَّهْ
الدَّفَى النَّاشِحْ يْتِمَّهْ ** الدَّفَى الفَايِضْ لِلْحُرْمَة
***
ضَالِكْ بِينْ لِهْنَاشِيرْ ** رَايْدَة مَلْڨَى لَعْشِيرْ
كِسْرِتْهَا بِيدْ غِشِّيرْ ** تُبْطِلْ صُومْ عْوَاشِيرْ
عْڨَابْ عْمُرْ تَ نْغِيرْ ** مِنْ شِنْتِي صْغِيرْ
ڨْلِيبِي عَاشِڨْهَا غِيرْ ** ڨْلِيبْهَا عَاشِڨْ الغِيرْ
أمير الوسلاتي
Website Design Brisbane
Tags: