منحبكش مراج وخرنان و حزار و ما نحبكش مستهتر و ما تغيرش عليا..منحبكش شيطان و تخدم مخك معايا و منحبكش ملايكة و بوهالي..ما نحبكش بهبار و ثرثار ومنحبكش سكوتي و متعبرش..ما نحبكش تبع سياسة و تحكي برشا في الكورة اما لازم تكون  صاحب موقف و عندك قضية و تحب جمعية..

نحبك كتصبح على العباد الي ما تعرفهمش وما نحبكش كتحل هدرة طويلة و فارغة مع التاكسيستية.. نحبك تتوفه كان معايا و تسمعني للخر و انا نلبز.. تلوج معايا في الحوانت على سباط ولا منقالة صنعتها في مخي..

نحبك فنان كاتب ولا رسام تجيبلي وردة بالمناسبة ولا من غير مناسبة.. نسيت حقا أنا منحبش ريق الورد والدبادب.. خليها شكلاطة خير تعرفني نحبها كيف ما تعرف ما لازمكش تنسى اشنو ناكل و شنو ناكلش..نحبك تحفظني مليح كيف ما أنا حافظتك و حافظة ريحة البارفان الي تحبها في الصيف..

نحبك بسيط كيفي..ما تحسبهاش وما تعقدهاش ..ملي عرفتك قتلك ما نحب شئ كان ماتوجعليش راسي و ما تمرجنيش بالهداري الفارغة.. اما زادا نحبك تهتم بالتفاصيل..الحاجات القديمة..الانتيكة..التاريخ..الكتب و السينما وما نحبكش ياسر رومنسي و منحبش حب ماسط و باسل..

نحبك ك تبدى تتغزل بيا و تقلي سمنت نقص شوية و مش مزيان اللون الي في ظوافرك نحي عليا تعرفني نحب لون واحد كهو..و ساعات ما نحبكش اكاك و لازم تقبلني انا كيف ما انا نسمن و نلبس بالنوار و نعمل فرني مش أحمر في يديا..ما ترسمنيش ما تفصلنيش ما تقهرنيش ماتنرفزنيش وزادا ماتتغش عليا تعرفني ساعات نفد و نولي رزينة كنهار اﻷحد العشية..تعرفني نحبك من اللمعة الي في عينيا مالا علاش تمرج فيا..وساعات كتكثر و تغلب عليا ونتعاركو نقول خلينا هكا من بعيد لبعيد خلي تقعد تصويرتك المزيانة ونقعد أنا الطفلة الي حابيتها الناجحة المستقلة القوية..ناخذ لروحي الشكلاطة  ونهديلها البراسلي الي بالخمسة..نلبسها ونتخيل الي إنت جبتها ونخترعك في خيالي و بيك نعيش...