- سامحني بابا.. حبيت نلقى منك اثتين.. نسيت لي الباهي في الدنيا متاع مرة موش مرتين و اللحظة لي تتعدا لازم تمحيها في رمشة عين، نتفكر كي كنت تقلي نوارتي ما نعطيكش للي يجي و نهارة عرسك نفرشلك بالورد جنينة تخليك أميرة باش يعرف لي اختارك أمير و يحطك في عينيه..

سامحني في لحظة نسيت كلامك و اخترت لي رماني بدموعي واحزاني و لي ستنيتو حتى نشف الريق و مالقيتو لي فرحني نهارين و استنيتو سنين سامحني خسايلتو كيفك طلعت انا لي كيفك..

طلعت انا لي طحت ووقفت لي استنيت لي تهنيت ببحلمة لي حبيت بلا شرط لي اخترت بلا عقل و لي مشيت بنية.. أنا إنت يا بابا أنا عقلك أنا قلبك أنا نيتك أنا عينيك.. طلعت ليك حلمت و مالقيت مرضت و ما شفيت أما و راسك يا بابا قوية.أنتم؟ ما كمش كي بابا ..

هو حبني قبل ما يراني و انتم حبيتكم و هنتوني نسيتوني غدرتوني أما و ربي ما عندي ما نلوم و لحياتي كتاب جديد موش متاع صفحة ولا صفحتين متاع قلب يعيش و عقل يخمم متاع نية يرحمها ربي.. بنتك كبرت يا بابا عرفت لي الفايدة موش يولي عمري عشرين الفايدة نرى العباد لي يكبروني سنين و عرفت لي أنا كي خسرت ربحت خاتر مع الجرح و الجرح ألف درس.