جابونااا للدنيا من غير ما شاورونااا ... حليناا عينيناا في بيت بالرووز ... سرير رووز... Papillon فوق راسناا رووز زاده... زربية روز... كل شي رووز... احلامناا الكل ولات رووز .... مع الاياام كبرنااا... علمووناا نعييشو نجنحووو نمشوو لعالم اخر ... نساافروو لدنياا اخرى ... نعملوو جناحاات و نطييرووو بين السحااب مع العصاافر و كيف نتعبوو نرقدوو على غيمة من الغيماات الضايعة... علموونا زاده نحترموو الكبير و الصغير ... علمونااا نرضو بالقليل و نطمحووش لقدام برشاا خاطر ولد الفقير ما عندوووش الحق يولي امير...

علموونا برشاا حاجات اما علمووناا زاده نقروو و نمسحووو و نطيبو و نغسلوو و نسيقوو و نرقدوو و نعرسوو و نجيبو الصغار ميهمش كل عااام صغيير عادي البنون زينة الحيااة و علمووناا نسمعوو كلام رجالناا و عمرناا و ماا نعصوو كلمتهم خاطر الرجال قواموون ... علمووناا نربوو صغارناا كيف ما تربيناا باش يطلعو متربين ... علموونااا و علموونا ... اا و نسيت علمووناا نمووتو و ندفنوو روااحناا و نحناا حيين ... علموونا برشا حاجات ... علمووناا يلزمناا نكوونو مزيانين في كل حالاتنااا ... يلزمنااا نكوونو كيف تحفة ولا كواتروو ولا لوحة زيتية ولا اي objet لا يتكلم و لا يتحرك و لا يخمم بطبيعة من هااك الpapillon اللي ملبزينهاا على روسناا ...هذا الكل بااش نعجبو اللي يشووفناا ... علمووناا نخبوو وجييعتنااا بضحكة... علموونااا نلبسوو روبة على السكاكن المدغورة في بدناا و نعملوو شوي ماكياااج لا برشاا مكيااج مش مهم بااش نخبوو تحويق عينيناا ... بااش نخبو هاك الدمعة المحصوورة ... باش نخبوو التجااعييد اللي بادياا علينا ... اي يلزمناا نخبووهاا... مالا تحب يقوولو شوو فلانة ولات عجوزة... يلزمناا نخبو عيووبناا و ندهنووو وجهناا بقنااع الفرحة و الرضاا و الكماال ... اي باش نعجبو لعباااد و مايقولوش شبيها فلانة كيف حمة شراب... و تنسااش التبسيمة ...

ديماا كشخ حتاا كان ش تبكي من داخل اضحك ... كل ما قلبك يبكي قوي في الضحكة ...و كيف تروح للداار نحي قنااع الفرحة اما تاكد اللي انت وحدك في البيت  و لف بدنك في غطاو دك راسك في مخدتك و ابكي ... ابكي و فرغ قلبك ... ابكي على اللي غدرووك ... على مشااو و خلووك ... على كل وااحد قالك ش نبقاا معااك اماا وينوو ... و كيف تتذكر كيفاش حسدوووك اضحك اماا مش فرحة المرة هااذي خاطرك وحدك على شكوون ش تكذب ... حسدووك على الضحكة اه كاان يعرفوو ش ورااهاا ... ش ورااك انت بكلك ... انت اللي مركبة روووحك باش تعجبهم ... اي مداامك مرااا يلزمك تمكيج و تلبس و تبرفن بااش تولي انثى ... يلزمك تعمل épilation و ما تخلييش حواجبك كيف الغولة يلزمهم بالمسطرة... شعرك يلزموو يبداا يا اكحل ... يا اصفر و كان تحب التنوع اعمل احمر رماني... رد بالك تعملو ازرق سمااوي...ولا اخضر شعشووعي... يقوولي لانت مهبوولة ... ريحة برفاانك يلزمهاا فحفوحة ... اي رااك مراا ... رد بالك تخمم تكمل قرايتك و تتوظف ... خاطر المراا ما عندهاا كان دار راجلها... رد بالك تخمم تخرج ولا تساافر ...رد بالك تسهر لعقااب الليل ...رد بالك تحكي حتا مع زميل... رد بالك تاكل لا تسمن و لا تضعف وزنك محسوب بالغراام ... رد بالك تقوول لا كيف يجييك عرييس خااطر هكاكا تولي بايرة و بيك و عليك ...رد بالك و رد بالك ... رد بالك تعيش

علاش مجتمعناا يحط في هلمقاييس... انت  أنثى حتى انت لابسة بيجاماا تااع خووك و شلاكة بصبع و كلاسط مقطعة... انت أنثى حتى و  حواجبك كيف الغولة ... انت  أنثى  حتى منغير épilation ... انت أنثى  حتا شعرك ازرق سمااوي ولا اصفر شمسااوي ...ولا مووف باذنجااني ... انت  أنثى حتى و ريحتك بالبصل و الزيت عاادي ... انت أنثى حتى و انت حمة شرااب... انت أنثى حتاا كاان بطا مكتووبك و بقييت عانس ... انت انثى حتاا كاان حكييت مع 99 طفل تكوون انت ل 100 ... انت انثى حتاا كان ما عجبتش خالتك فلانة و عمتك فلتانة ... انت انثى و ماكش مجبوورة تعجب حد ... حب رووحك و اتلهاا برووحك خاطرك انثى مش بااش تعجب فلان ولا فلتاان ... اتلهاا برووحك اماا رااك مزياانة بكل حالاتك حتاا و انت شعرك ملمووم كعكة و وجهك بالحب عادي ... انت مزيانة منغيير ما تدهن وجهك بااش تعجبهم ... انت مزياانة منغير ماا تعمل عملياات تجميل و الكل باش تحببهم فيك ... ماكش مجبورة تعجب مجتمعنا اللي يفشل اللي يشووف لمرااا بدن مش رووح ... خلي رووحك خفيفة و ما تتصنعش ... اعمل اللي تحب علييه طير و جنح ... اقرا و تعلم ... اخدم و ساافر ... اقراا رواياات احلام مستغنامي .... اسمع غناياات كاظم السااهر... اقراا قوااعد العشق الاربعوون ... ما تخلييش احلامك عرس و داار و صغاار ... ما تخلييش اقصى طمووحااتك تغسل المااعوون ... تمردي تدلي ... اي خاطرك انثى ... خاطر مزياانة بكل حالاتك و تاكد اللي انت انسانة تغلط و تصلح ... تحس ... عندهاا مشااعر ... عندهاا حاجات تحبهم و حاجات تكرهم... عندهاا حياتها الخاصة... اصنع جوك و ما تخلي حد يجمدلك احلامك ...مش خااطرك مراا...خاطرك انثى