كل واحد فينا و نوع الكلام لي يأثّر فيه لي يدخل لقلبو و يخلّيه يحكي أما كلامك انتي كالعادة جا موزون مختار بالحرف بالطّرف عارف آش يخلّيني نحكيلك و أش يخلّيني نسكت عليك و كي قتلي توحّشت كتيبتك حرّكت فيّا محبّة سنين و رجّعت وجيعة بعد العامين كاينها بدات من ثانيتين .. توحّشت كتيبتك وراها اش بدلك عليا و طفّى لهفتك ليا و وطّاني في عينيك و خلّا حياتك ظاوية بلا بيّا

أما انت وينك كي كنت مكبشة و نشكيلك لي بعدك حرام و قتلك هات نحطو يدّك في يديّا نحكيلك على الدّنيا على الحاجات لي حبّيتهم و تمنّيت نكمّل بيهم الثينّة ..إيجا نحبّك و بعمري و قلبي نودّك ونزيد نزرع البوسات على خدّك , نعيش عمري معنقتّك متخبية في صدرك و على شهاويك و اللّه ما نردّك .. أيجا نهربو لبلاصة ما يعرفها حد و نكتبلك كلام ما قالو قبلي حد و نحّبك برشا أنواع متاع حب و من حبّك نملى و نفرّغ جيوب و نمشي معاك دروب و دروب و نحلّيو سراب حياتنا و نمليوه ورود  و قدّامك نتعرّى من جلدي و على حبّك ما نتوب

وينك كي قتلك إيجا اقرب و شوف قدّاش من تبسيمة وراها وجيعة و قدّاش من خيال مبني على ميات تلميحة رسملك ضحكة وفالي ببكية خاطر توحّشت منّك كلمة حلّوة على غفلة في عزّ التعنيقة  وتمنّيتك على خاطري تلقى ربع طريقة نقصرو بيهم المسافة لي تبنات بيناتنا و ما كنتش حاسّتها إلّي بعدت عليك بدا من سنين   حسبتها انت بالنوامر و الوقت وقتلي على بعضنا مش راكبين..

وينك كي قتلك الحجج متاعك عمرهم ما كانو نهاية خاطر  أنا و انتي أكثر زوز قراب بعاد على بعضهم و بالحيلة نرجعو نقربو و باقي نحبّك و نمرّد و من وجايعي لي ركّبتهملي نتجرّد حتّى للّي وحدي وحدي فهمت لي الأمل وفى من حكايتنا و زايد نحسد حد قريب منك أكثر منّي خاطر مهما كبرت محبتي ما يرا حد وجهك لي ما يعرفو حد غيري ...

انتي لي بعدت بدّلت محبّة بمحبّة و فرحت و سرحت و في دنيتك الجديدة هربت أما توحّشت كتيبتي تحب تملى بلاصتي خاطر ما لقيتش كيفي في غيبتي و راجع عندك أمل تقلّي محبتك ما تموتش ما تغببش و من غيرك ما تغيرش نحب نبني معاك لي فات و نرجع نسمع منّك الحكايات..

أما يا روحي مش لي فات مات ؟

شكون كذب عليك و قلّك بنيّة كي باقي البنيّات بلفطها ترجع عاشقة فيك في لحظات ساعة فيبالي كلامك كلام بيات كي يأثّر يهبط مرتّل منطّم تقول آيات أحر على قلبي من بوسة شفافك كي كانت محبّتنا في أوّل أيّامات, في بالي تأثيرك عليّا قوي ما يخلّيني بخلاف الجرية ليك ما نخمّم في شي و لا انت من قبل هكّا أما كانت عينيّا مغمظة عليك و توّ ريت حقيقتك كي الحب معادش مكتوب ليك ؟

لي فات مات يا كبدي و الكفن حظر و على خاطر العشرة و الحلو و المر عيب في الأبيض تتدفن عيب نزفّك لبرّى من حياتي كي بقيّة الناس الكل لازمك تخرج منوّر زاهي ريحتك ياسمين و فل و على باب الوداع نقرالك كتيبة نودعك بيها قدّام النّاس الكل و في بلاصة إيجا نحبّك نقرالك يا صادق الكذبة ليام تهون و مبدّل محبّة بمحبّة حلال في فراقو نخون