كيف كل يوم يا حنين ..نتوحشك و نلوج عليك و مش عارفة انت وين ..

ماللي نطلع في التران و انا تايهة بين الوجوه و بين العينين ..نلوج نلوج نلوج و نزيد نضيع و ما نلقاكش..

مش عارفة علاه نستنى فيك ..نستنى شنراك و شنشد يديك ..نستنى شنحكيو شنضربك و شنبوسك و بش تقلي سكيزوفران و بش نزيد نضربك و نبوسك و نتخبى عندك ..

نتخبى من وجيعتي اللي وجعتني بيها ..نتخبى مالبارح الخايب اللي قاعد يجري ورايا و يجري بيا ..البارح الخايب اللي بعدنا فيه ..اللي سلمت فيا ..اللي وجعتني فيه ..اللي في لحظة كنت بين عينيك و في لحظة حليت عينيا

في ظلام..

تعرف ديما نقول يا نهارت اللي نراك شنوة شيصير ..

شهرين نفركس فيك و  كل يوم ثنيتي على ثنيتك و ما تعارضناش ..ربي يصبّر فيا ..يبعد فيا ..يسنّس فيا..يختبر فيا ..و الا ينتقم مني..خاطر قربتلك و بعدت عليه..خاطر حبيتك اكثر ماللي وصّى بيه..خاطر تجاوزت حدودو معاك ..
مش عارفة ..

زعمة شنوة يصير كي نراك ..زعمة نحكيو كيف زوز حبو بعضهم و الا نتجاهلو بعضنا كيف زوز عمرهم ما عرفو بعضهم ..زعمة تلومني كي خليتك و الا نلومك كيفاه ديما مخليني و سلمت فيا؟ ..زعمة يصير و تعنقني و الا تقلي توحشتك بش تطفي النار اللي شاعلة فيا و الا تزيد تلهبها و تقلي رتحت منك و محلاه فراقك..زعمة تخزرلي خزرتك اللي حببتني بيك و تبسيمتك و هزّت حواجبك و ضحكت رموشك و الا عين و تلفيتة و تتليفة ..زعمة شنوة شيصير ..زعمة ترجعلي جناحاتي في قربك و تهنيني بحنانتك و نعاود نطير ؟ زعمة يرجع اللي كان و خير ماللي كان؟؟..

كل ما نقول نسيتك و سلمت فيك و باب و تسكر ..يتحل الف باب ..كل ما يتحل باب التران بش نهبط و الا بش نطلع نستناك ..كل ما نمشي خطوة نتمنى تعرضني نراك ..كل ما نغمض عين نتمنى نحلهم نلقاك ..كل ما نرقد نتمنى نقوم نلقى بعدي عليك حلمة و وفات ..كل ما نقوم نتمناه اخر يوم بعيدة عليك ..كل ما نقرى نتمنى صدفة تجمعني بيك ..

توحشتك يا روحي .. كيفاه يعيش بدني بلا روحي..كيف اي حاجة ناقصة ..كل شي ناقص ..كل شي ناقص..كل شي ناقص..كل شي ناقص و قاعد يزيد ينقص كان  الوقت قاعد يزيد..يا ريتو ينقص..