علاش بعتلي اوهام خلصتها انا من شوية الروح لى قعدت فيا ؟

كنت عارفت إلى حلماتى أكبر منى أما يجى نهار ونعيشهم معاك، كنت نجم نصبر خاطر قاعد نخبى لغدوة فيه إنتى، ونعرفك ما تبيعنيش، كنت نتصور بلي عمرك ماتسيبلي يدي .. خزرت لروحى خزرة خايبة كيف كبست على يدك و جبدتهى ..

كملت ثنيتى وحدى و اليوم قاعدة نتعلم نعيش وحدى، كتبلك كل ما نتوحشك وتفقدتك برشة، بعثتلك برشى جوابات و كتبتلك برشى و انتي ماكلفتش روحك و قريت .. نسنست عليك وحسبت روحى ما فيباليش ، كل يوم نتفرج في تصاورك و في اخر اليل نسكر كل شي و نوعد روحي باش ننساك .. و نبات معنقة خيالك ..

موش انتي الي قتلي تصرف انساني كيف ماتقدر .. قتلك كيفاش مانجمش بالله خليني .. قتلي مايهمنيش .. و انا الي كنت نرى فيك دنيتي الي ياسر محلاها ..

قتلك if i could I'd get you the moon مانتصورش روحي نبخل ..

قلي موش انتي الي قتلي بلي ماناش نفس الاحلام ماناش نفس المستقبل .. موش انتي الي همك كان في روحك و كيف قتلك ماحاجتي كان بيك خليني جنبك ناقف معاك والله ماحاجتي كان بيك .. هات يدك و ايجى نرسمو في الصحرة طريق .. نبنيو دارنا حجرة حجرة وكان ماخلطناش ميسالش انتي داري و انتي دفايا .. ايجى مازلنى صغار شقولك فك علينى من خنار العرس و الصغار .. انا ماحجتيش بدار بمليار و لا كراهب و لا افار .. ايجى نلمو بالفرنك و ندوروها الدنيا بلاد بلاد .. ايجى نكمبيو و نباتو في الخلى .. ناكلو مالشارع خاطر انا بيدي تطيبي مايعجبش ..و انا معاك مايهمنيش ..

تتفكر قتلك انتي مشروع العمر الفلوس تمشي و تجي و انا ماحاجتي بفلوس .. نهارتها و احنى في زناقي الحومة .. قتلك نحبك و ستنيت باش تقلي قداه تحبني و انتي ماقلتش و كيف قتلك قلي بلي نكرهك ماحبيتش .. حبيت تخليني معلقة بين الزوز .. تتفكر كيف بستك من يدك .. كانت امي فين تمدلي يدها ماغير مانخمم نبوسها و ماغير ماخممت بستك .. كنت نرى فيها الحب .. و نرى فيك المعزة ..غلطت كيف حطيتك في غلاوة يد امي و بست اليد الي كيف شديتها بالقووي رخفت و جبدتها و خليتني ..

.تمنيتك حبيتنى أقل شوية راهى حياتى مشات أسهل، تمنيت راك حبيتنى اصلا كيف مامشى لبالي ..

عديت ليالي معنقة خيالك و مانحبش نحل عينيىو خايفة نحلهم خاطر نعرف بلي موش باش نلقاك ..

عديت ليالي نلقالك في الاسباب الي علاجالهم خليتني .. أكبر غلطة عملتها أني حبيت فى بلاد روحى روحى لا يرحم من مات .. و الجديد يا رابح ..

--
غلطتنى بلي عمرنى مانراو الدنيا كيف مايراوها الي معانى .. نحبو كل شي لينى و ننساو بلى موش بيدينى .. الحب حاجة ياسر محلاها ماتتطلبش و كان نهار وصلت طلبتهى معاش تتسمى حب .. سعات نحبو الناس الي دايرين بينى اكثر ملي نحبو رواحنى .. نخمو في مصلحت الي نحبوهم و ننساونا احنى .. و الي نحبوه يضيع بالوقت و نتنازلو على حاجات عمرنى ماتصورنى رواحنى نتنازلو ولا نتخلاو عليهم ..
--
ما حبيتش توفى هكة ، ما حبيتش نوصل هنا و ماحبيتش الحاجات المزيانة الي فيا تموت و مانحبش نهار يكساح القلب و نتقلب و نتبدل ..ما حبيتش نوصل نبرد هكة و بعدك ما حبيتش نعرف، مانحبش العدد يكبر و احلامي تمشي و تضيع ..

علاش .. ؟ خاطر هالخايب يتعاود ومانحبش نولي حجرة .. معاش لا تكره لا تحب ..

انا اليومة حاجتي بالدار الي بمليار.. و اليومة الفلوس قعدت و انتي الي مشيت .. و This sunflower's no longer waiting for you ..

مع كامل الحب و تمنياتي بمزيد من النسيان ..