لساعة نصف النهار و درجين اليوم نهار جمعة نهار فضيل المكان قهوة خالد غادي وين نقعد مع روحي شيشتي منصوبة و كاس تاي منعنع بزايد قارس فوق الطولة وحدي الساق على الساق النفس ياخو خوه و الدخان خارج من الجواجي يلاجي الناس مشغولة في حكايات فيها التافه و فيها المهم الي يحكي على الكورة و الي يحكي على الدين و الي يحكي على السياسة و الي يحكي على البنات و البطولات متاعوا معاهم و انا في وسط هذي الخماضة الكل نحاول نكتب حاجة و نرتب افكاري حاصيلو خماضة من داخل و خماضة من برى في وسط هذا الكل تذكرتها كان هي

ما فهمتش علاش اليوم بذات جات في بالي و سكنتلي في خيالي تذكرت ضحكتها و تبسيمتها و تذكرت كيف كانت تقولي ما تخافش معندنا منين هاربين من بعضنا تبسمت و قلت بيني و بين روحي حتى شئ ما يدوم هوكي خلفت بالوعد مشات قعدو كان الذكريات و الهمسات و الضحكات الي في وسطتهم برشا حكايات  نتذكرها كانت قوية كانت حنينة كيف نسمت الصيفية كانت محلاها كيف مطر الشتوية كانت ملايكة اما هي دونية دونية خاترها مشات علية زعمى هي فرحانه و متهنية و لا كالعادة تفلم و تمسكي باش تضهر روحها قوية كنت كان انا نعرف الدخلاني كنت نعرف الي هي في همومها غارقة و تعاني موش هي الي قالت عينيها الي حكات عينيها الي سيلت الدمعات و بكات

  .. كنت نتذكرها كان في الليل اما كلام الليل مدهون بالزبدة ...