Emna Frawes - آمنة فراوس

...الشارع يغلي..بيران ...قهاوي...مطاعم ...الناس الكل تضرب في الدمق ...مفهمتش شكون تابع شكون ...ناس مخلطه و عينيا تلوج فيها .....هزيت عينيا  نشوف في (l'affiche ) الفيلم اسم < آخرديسمبر>

نتفرج فيه أول ديسمبر. سي معز مولى الفيلم ضاهر فيه ذكي ...

باين عليه فيلم جديد  ....ايه يا مكبوب جاك نهار وليت تمشي فيه لسينيما تفكر ه العام مليح 2010 ...خزرت للوقت 17:50... زعمه ماهيش جاية ...تطلعشي نساتني ...كان عطاتني نومروها راني كلمتها...نقص تكيات حتى تخلط...و كان ماجاتش...والله الا ما ندخل نتفرج وحدي...وقفت قدام   guichet  انا مديت يدي و هي قتل شتعمل مش قتلك على حسابي ...ميزيش عندك ساعه هوني و مشفتنيش ...و فوق من هذا تحب تضيع عليا وهرة اني نكون انا صاحبة الدعوة....

كين شكون جا و صب عليا سطل ماء بارد...شردت ...تي منين تخرج ه الطفله في كل مره كأنها روح  تبع فيا وين ما نمشي ...

هيا ابعد فما عباد تحب تقص ...ايجا ندخل ...نشد بلاصه باهية....الصاله معبيا.

دخلنا من غير سلام ...سمعت كان تخرنينها...

منجمتش نثبت فها ... و في زينها ....شميت ريحتها البنينه...

عيناها مرشوقه في الفيلم و عينيا مرشوقه فيها...

تقعد تقعد و تتبسملي ...عيناها تضوي كي نجمه في وسط ليله ظلمه

فيلم منعرفش قعد وقت اما نعرف الي انا قعدت معاها عمر.

اه شقولك في فيلم عجبك ....ايجه نبوسك فبيلة مسلمتش عليك

بتستني من خدي لوله و الثانيه ...وقتلي تشرب كاس

نشرب مالا مانشربش

وين تحب نمشيو....

اقرب حاجة الساركل

فكره ....يعجبني

نعرف.

ههههه منين تعرف

نبيهة ....و طرشقت بالضحك.

حطت ايدها  في ايدي ...و قتلي ...ما بردتش

بردت...خلي ايدك في يدي