تتجبّر..
تتكبّر..
!! بصحتك
!! عطاك الله قوة في بدنك
..شفتني قدامك كاين ضعيف

..البدن خفيف و الجلد رهيف
..شفتني قدامك حيوان صغير
, بكف كبير
.. يبعد عليك و يطير
..شفتني قدامك انسان بلا قيمة
..انسان بلا مزية
..انسان مش انسان
..انسان معندوش الحق يرجّع عليك
،و لا يفدلك معاك
و لا يغششك
و لا يحاذيك..
و لا هو يوتجع منك
و لا يتغشش منك
انسان يقلك "من بعد اذنك" قبل ما يتنفس حذاك ..

لا يا بابا الزمان هاذاك  مشى و ولّى  .
نجاوك ..
أي نعم نجاوبك.
تسبّني نسبّك
تصيح نصيح
تعلّي  صوتك نعلّي
و حتّى كي يخطرلك إطيّح صوتك شتسكّتني
ما نسكتش
نزيد نعلّي..
الأمور مش بايديك
كي تتعدّى عليّا و على إنسانيّتي
توقّع منّي كل خايب
توقّع منّي ما يشويك..
أي هاك علّيت و سبّيت
قتلك صحّيت
هزّيت عليا ايدك و ضربتني
بارك الله فيك
..شعرة لا قتلتني
وقتها تقتل روحك و ما تنجمش تسامح روحك
وقتها لا ينفع سماح و لا ندم
اي شنوة ناوي؟
تستنّى لوقتها بش تندم و تبدّل من روحك ؟
شعرة لا قتلتني..
و قمت أنا من طيحتي..
و بضعفي و بفضيحتي..
.. باقي ما سكتلكش
حبّيت تبوسني ما خليتكش..
حنانتك بعد حيوانتك ما نرضهاش
و الضلم و العقليّة الفاسدة ما نسكتلهاش
العقلية اللي تخليك  تضربني باسم الرجولية
العقلية اللي تخليك تتحكّم و تتأمر عليا
كان نتكلم تتبلّى عليّا
و كان نسكت تزيد تتبلَّى عليّا
بطبعي حقوقية
يا ولد البيّة
..و الدنيا علمتني ما نسكت عالحق
و ما نسكتش للغلط ..
لا يولّي الغلط هو الصحّ..
كان كل واحد يسكت و يطيّح الدنيا تولّي ضلاام في ضلام
غابة و ساكنينها ذيوبة
..ضربتني يا رجّال
ضربتني و زدت ضربتني..
و أوّل مرة نتضرب تضربت على ايديك
ايدك اللي عمرها ما شدّت ب ايدي
و لا عنّقت كبيدي
ايدك اللي تهز بيها التلفون تسال عالبرّاني و اختك ما تسال عليها
آش عاملين فييها
امثالك، و آش الدنيا عاملة فيها
تضهرلك ديما تضحك ما تبيّنش
ما تشكيش و ما تخرننش
و كيفك كيف غيرك حد ما يعرف سرّها
و لا يعرف بحور الدموع اللّي تصرّها
هاك ضربتني..
.. و ضربتني و ضربتني و خرجت
مشيت نشكي لأهلي و أمّاليّة
قالولي عاد شبيه مالوا إلاّ راجل و مالك الا ولية
قالولي ضربك و تشكي نزيد نضربك و زيد اشكي
طرف الحنانة متع العيلة اللي كنت مكبّشة فيهم و نبني عليهم في عيلة مزيانة تحرقو
حرقوللي عصابي و هدّوني..
و كي تكلّمت و صحت و بكيت لاموني
قالولي هذا صوتك اللي شيوصلك للهاوية
يا ناس عيب نتغشش كيف الناس ؟؟؟
يا ناس غريبة!!
يستفزوك يضربوك و يبكوك ،
و كي تحكي و يعلى صوتك عالضّلم يلومموك ..
فما شكون متغشش و متنرفز يجاوب بأصوات هادية ؟
ماو يا صوت عالي يا يسكت و الا انا غالطة ؟
حاصيلو،
..تلمّو جمييييع و عملو حلقة ولّاو كلهم يفهمولها
دارو فيها كلمة كلمة ع أساس،
الراجل ما يتلام و هي المشكلة بالاساس ..
هي تنضّفلو و هي طيبلو ..
و تغطيه و ترويه و مش مزية
هكا قال عليها الوليّة..
و هكا وافقوه
زادو حلّوه ..
دار الدور في الحلقة و مزالت تجاوب ما سكتتش ..
وضاح للناس الكل و وضاحلو غلطوا،
أما هي مزالت ما بردتش..
قلبها يخمم في اللّي تعدّى و في اللّي جاي و رزن بالتخمام..
شافت الموت ع أرضها ، آش يضمن متشوفهاش نهار اخر القدام
خممت في اللولاد اللي عرفتهم و حبّتهم
و خممت في راجلها نهار اخر

و هي تخمم قالتلها خالتها
عادي الرجال و النساء الكل تتعارك و لازمو يضربك و تسكتي
"تو كي تعرّسي تو تفهمي و تولي كيفنا..
جاوبتها و قالت : الموت تهزّني
و لا راجل يخليني كيفكم كي يتجوزني
نعيش بايرة متشردة و ندعي بالرزق من الله
و لا نرضخ راسي و نحط من قيمتي للمذلة
انتوما اللي رضيتو هكا خليتو العقلية اللي هكا تعيش
اما انا ما نقبلش
نهجّ و ننكر فيكم جميع ،و ما نقبلش
ما تخلقتش بش نتضرب
تخلقت مرى مزيانة و بدنها مليان حب
ما تخلقتش بش نتذل
كلمة منا و سبة منا و ضربة منا و نعيش بخوفي
تخلقت قويّة و ما نعطي للذل كاروا و لا نعيش تحت خوفي
تخلقت قوية
حنينة
زوينة
و رزينة
العقل عقلين
عقل لفوق و عقل في القلب
و القلب قلبين
واحد عاليسار و لاخر في العينين
أخزرلي مليح
ربّي صوّرني مزيانة بش تحبّني ..
بش تحنّ ليّا
بش تحنّ عليّا
بش تعنقني و تحس بروحي
بش تبوسني و تنسى وجيعتك
و بش تشد بيدّي تونّسك في جرحك و في مرضك
صوتي حتى كي يعلى يبقى حنين
بش يبربش فيك هاك الطفل االباهي اللي فيك
زيد اخزرلي مليح
للعينين اللي يباتو عليك سهرانين
فيك عاشقين
فيهم لمعة
لمعة مأمّنتك عليّا ك أننّي أختك
لمعة فرحانة بيك و خايفة عليك من شر الدنيا، كأننّي أمّك
لمعة حب ترى فيك زين الدنيا، كأنّني حبّك
لمعة تلمّ كل لمعة تلمع في خاطرك، كأنّني بنتك ..
هاي كيفاه ناوي ؟ تكمّل ديما تضربني في بلاصت ما تربحني ؟
و تقتل هاللمعة و تقتلني؟؟؟
راجع روحك ..
و بربش في روحك على روحك..
و ما تحاولش تتجبّر..
و تتكبّر ..
ربّي كبير ..