وليت نخاف مالزمان والوقت.... نخاف مالشر والحقد والحسد والمقت...وليت نخاف من واحد يضحكلي فالشارع... نخاف لا يطلع كذاب وفالكذب بارع....نخاف على الطفلة الصغيرة..في عوض ما تلعب بالصلصال ايديها تهرات بلغبابر والجفال... معلمتها ولات لالتها ... في بلاصة الأنشودة حفظتها كيفاش تنسى اخواتها ... وفي شور الدار فنات حياتها..

وليت نخاف لا نعطي الأمان في مخدتي ..تخوني وتسرقلي حلمتي ...وليت نخاف لا ندور نهار وما نشوفش عالحيوط تصاور الرئيس. موش على خاطرني رخيص ..أما نخاف لا نطلع بدلت البلاد.. و بش نعيش فالغربة تعيس

وليت نخاف ملعصافر بعد ما قالولي " قاتلي العصفورة".. وعرفت ألي العصفورة في بلادي علموها القوادة والرقادة والصبة والعبادة...

وليت نخاف مالكلام الحلو ومن غدرة الخو و مالتبسيمة الفلو.....

وليت نخاف لا نهار ما نلقاش الخربة إلي فالحومة ...إلي في حيوطها اسامينا وتصورنا مرسومة ...إلي بجليزها ركايبنا لتو مشرومة ... الخربة إلي كنا نلعبو فيها وحنا صغار وهيا ملكبر مهمومة... ولا حد فينا سأل.. شبيها مندية و حيوطها مقشرة و شبي ضوها فليل طافي .. و أمليها شبي حكايتهم مش مفهومة ...

مش مشكلة ولوكان ما هدوهاش.. ما عندي ما نعمل فيها... ياخي مش نرجع صغير ونلعب فيها البيس... تي ماهو تو يغطيوها بعلم كبير في أول زيارة رئيس