و يعلم ربي.. قداش صبرت و كنت نبكي و نخبي

يعلم ربي اش محير وجع قلبي و اش مخليني نرجعلك و نحير لي مخبي .. و يعلم ربي لي وحدك انت الراجل لي عرفت تفضع عورات قلبي لي دفنتها سنين ..

سنين ؟ ايه سنين وقت انت متهني فالعسل تخزس فالبحر تصبح على بوس الشفايف و التعنيق و ما علبالك بالي في النار يتجمر ..

سنين ايه ..

نرقع في الحفر لي تسببلي فيها كلماتك الكاذبة "والله نسيتها والله انت الكل والله نحبك والله نحب تاخذك والله لاعاد نحبها " .. تتفكرو كذبك هذا ؟ باهي ماعلينااا مالا كيفاش انت لي يتم حذفي من قائمة المقربين باش تصحح ورقة تقرب قلبين عفسولي عمري لثنين .. ؟

سنين ايه ..

نصلح في تكسيرات الروح و نعقم بالكتيبة هالروّح .. و فياببك نسيت ..؟

ماعرفتش نبرد اما ترقد دمي داريت ..

انت وقتها بتحقيق "حلمة " تلهيت ..

انا مازلت في اخر سطر كتبتهولي موجودة .. تتفكر ؟ و حتى كان نسيت اسألها هي تعرف ..

تعرفني كيفاش خبيتك في حضني وقت وجيعتك و سترت عيوبك و ليعتك .. نسيت ي وجعي ؟

مش انا هي نفسها لي بكيت قدامها من وجيعتها هي ؟ قتلي تحب نبدل الثنية قتلي انت لي باش ننساك بيها و نسيتها بيا ؟ لا زدت عفستني و كسرت كرايمي هديت روحي و ما رحمت الي بيا ..

تتفكر ؟ قتلي مجبور و لي تخطط عليا مفروض و ماعندي وين نهرب منهم فرضوووها عليا ولديا .. بابا لازمو يرضى عليا امي تبكي اختي تندب خويا يقرق .. كلهم على بعضهم ما يجيوش في دمعه مني.

ا نسيت ما قتلكش نهار فرحك بكات عليا اميّ ..

قتلي ي بنتي انسي غدوة يجيك سيدو .. بعد شهر و ماجاني حد طيفك لتوة لابسني كالجن

لا عرفت نخرجك لا فهمتك شتحب ..

انت اخترتها و مشيت سكرت الثنايا الكل قفل البيبان رميتهم ورى البحر .. و ما شفتش وراك اش صار ما لوجتش على حتى خبر ..

جاتني هي في حلمتي قتلي" لي تكسر يتجبر ربي يعوض عليك اختي مكتوبك مش معاه "

و تعدىّ الوقت عليا بالمر .. كل نهار يزيد ينقص من العمر يتكلاسا في قجر " ضاع عليك" ..

بكيت برشا للمخدات .. ضربت يدي راسي ساقي كسرت اقلامي قطعت اوراقي فسخت ميساجاتي .. طفيت الضو قلت نورك عليا يتغبر و شيء .. باقي كالمريضة الممحونه نستنى عليك في خبر ..

" ا عزيز القلب ياخي مالي دفنوه ما زاروه " ؟

تعدىّ الوقت ..

و باقي من وجيعتي قسيت كسرت الحيوط صحت بكيت في الشارع تحت المطر مشيت .. كومت حزن تمشي عالارض تمسخ فيها .. انا هي

سواد يخرج من مخي كل ما نغزر لحد يسألني شبيك ..

و هو انا اش ما بياّش ؟

باهي هنبدى مالاخر ماطولش عليا .. معاش تسألني شبيا خاطر منعرفش.

و باقي الوقت يتعدى و انت وين ؟

تغرم في زمانك تعيش في اياماتك تحقق في احلامك مع فتاة اوهامك ي مريض .

طال غيابك هالمدة الوقت رزين واحل خالف لا يتعدى .. و انا مش نستنى فيك .. و منحبش نراك اما بالصدفه شفت تصويرتك في سهرية تبوس فيك بنية عرفتها لي هي الاميرة النائمة في احضانك لي انا علمتك ااحنية ..

شبيك نقصت برشا فاللحية و عينيك طايحه مرخية نحبك و انت سكران اما هالمرة هي غاطسة فيك و انت كالبركان هايج هيجان .. مركزتش معاك .. اما شبيك عندك زوز شيبات جدد ؛ ا شنوة شيبتلك وجهك .. تستاهل ي وجعي ..

بالصدفه شفتك و تعديت ماعلباليش بيك ..

السنين تتعدى خرجت للدنيا ..

لونت زينت عريت كلبت شطحت شربت دخت روحت سكرت على روحي باب الدنيا و قعدت نحكي مع روحي .. شبيك ؟ عاد كان انا نسأل في روحي شبيك .. على الدنيا السلام ..
انا هكك و جاني ميساج " سلام "

اوف يضهرلي من الكثر الشيخه نرى في اسمك و فيه وجهك .. لالا بالحق انت ..

اممممممما سلام تاع دين ولديك ي مريض .. منين السلام و شبييييييك تعمل هكا تي خرجت اناااا خرجت منك بريت قويت تعليت ..

شبييك ما وراكش حتى سلام ..

و حليت الباب.

--

والله نحبك ي **** نحبك قد ربي و تحب معادش نخبي ؟ نقول للعالم فيك اختصرت حبي ؟

يضرب الحب شو بي ذل .

تعنيقة فوق السماا و آآآه ي سامعي على اكا الكلام لي تحكى ..

حكينا حكينا بكينا تكوينا تشويناا رجعنا للصفر و بدينا في الغفييييص و الرفيس و فجأة تشققو الجروح و نطق " طق" الكسر و تهد البدن في تركينة القصر ..

-شبي عزيزي ..

-موجوعة ي **** ..

-سمحني انا اناني ، مش راجل ؛ خمتت في روحي و نسيتك .. سمحني يا روحي ..

-على شنوة بظبط نسامحك ؟

وحدي مانغير حتى ضغط و تأثير وشيت جبت ملح رشيتو في عمق جروجي .. طبيت ما الفرق على روحي و تشويت و انا نستحلى .. اممممم قداش نحبك انا ي **** ؟

رجعت ؟

رتبت حروفك ، حطيت ضميدة على جروحك ، سكتت طموحك و وصلت وين تحب اكتشفتو من قريب و عشتو و نظمتو و رجعت تتكى في الباقي التالي ..

خممتشي مرة اني ندعي بيك العالي ؟

نقول " أ ربي انت زرعت هالروح و انت مولاها خوذها عندك خباها والنبي تعبتني الامانه معاش عيني بيها" ..

اي ندعي بيك ؛ خاطر وحدك بلا بيا تتهز اركانك تترفض صلاتك تبطل طهارتك ..

---

رجعت ؟

شنوة كنت تحب ؟ مني انا تتحب ؟

اي نحبك والله نحبك ي **** و توة و انا نعرف انك تحبني .. و مستحقني و ساند بيا و حد ما فرضك عليا و انا عاودت خترتك كيما المرة لولا لي انت خترت فيها غيري و رميتني ايه رميتني ..

لكن هل سبق لك و ان عرفت انك هالمرة دفنتني ؟

معاش فيا للصلح مكان و لا عاد شيء يرجع كيما كان و لا باش يصلحني الزمان و لت باش يحتوي لعنت روحي حتى مكان ..

كانت عندي شهوة في روحي و حبيت مرة نخدم مخي عليك .. تشهيت تحبني .

تمنيت تخمم فيا تسهر على ضو عينيا تتوجع مني بيا تفكر شنعمل شناكل شنلبس وين و مع شكون و كيفاشو علاش ..

شهوة صبية .. أ توة معادش فيها لا صبية لا متهنية .. توة لا نحبك لا نصبر عليك ؟

لالا توة تحبني و ما تصبرش عليا .. كيف كنت انا بظبط وقت خليتني..

التراكن تاع روحي عشقتك ..

سيبت الخالق عبدتك ..

تخنقت و تنفستك ..

انا ليك فيدال .. والله فيدال يشهد عليا ربي لا عمري كنت كيفك .. انا منغرش بيك / ايه قصدي انت غريت بيا و ما خفتش ربي فالولية ..

وجعتني في روحي و في بدني و في مخي ..

بكيتك و حشيت يد عمري في حلقي باش نردك .. تعصرت باش نجضهرك و نقذفك .. مني نخرجك ..

اما فشلت من مجرد فكرة ..

خاطرني وين نهرب منك اذا مش ليك ؟

ماعندي حد يفهمني يحس بيا يرحمني ..

ايه .. هو انت زادة ما عمرك رحمتني ..

هديتلي جزء مني عمري و توة جيت كملت النص لاخر ..

ههههه ا على فكرة نصك انت لاخر في خير قصدي خيرين ثنين ..

-

نحبك والله نحبك ي **** .. للابد.

ايه انا التي أهتم بالابد .. و ما وصلتش عشتك دقيقة ..

تتفكر عيلتي هاك الليلة تشووووويت على لمسة مش حتى تعنيقة ..

اسسس اسسس ما تخممش في شيء

هذي مش وصية خاطرني ما عندي ما نوصيك كان تسميش بنتك على اسمي خليها سعدها قوي و ماتخليهاش تعرف راجل كيفك ..

هذي مش وصية خاطرك ما تقراليش اعمى العينين و القلب ..

ي حب كبير قد سما الرب .. ي حب كبير غفصلي عمري ..

كنت ديما نقلك لي نحسو معاك مش حب اما انت مافهمتش .. لي نحسو معاك مش عشق مش غرام لي نحسو معاك لذة الموت و الإنتقام..

تصدق شهوتي لتوة لا كملت

حبيت نشوفك نبوسك من عيونك و نتسبب نقول بوس لعيون يفرق .. اما انا نشوفك نزيد فيك نغرق

تعرف ي مايع ؛ انت اكثر راجل حبيتو ؛ ايه اكثر راجل تمنيتو قلت نعيشك ليلة و نموت حب اطلاع حب امتلاك تي تصفيت حسابات و تسكير دوسي اوجاع ..

لكن اوراقي قدامك مفروشة .. ي كاتب حروفي و قاري روحي .. تعرفني من كلمة تذوب و كيما ليلة نحلف نتوب و نكفر بيك .

--

مش قتلي وقت نقرر نمشي لغيرك نمحيك مني ؟

باهي كيفاش توة انا منيننجيب غيرك اذا حتى في الحيوط نشوف وجهك ! وين نمشي باش نشوف غيرك و نبدلك نختارو و نحرقك نعيش بيه و نطفيك نمحيك ننقم عليك نبكيك ؟ منين نجيبو ؟

مش قتلي نحبك والله و نتمناك و نشتهاك و نستناك و منخلبكش نجيك في حضني ندفيك قتلي باش تبنيلي قصر بين يديك و تحنن عليا ضلوعك و تخليني ديما ليك تحت عينيك ..

ايه تحت عينيك بين سقيك فوق راسك على جبينكو الف حكاية بيني و بينك و كيفاش توة في غيرك ؟

----

هذي مش وصية مش نص يتزاد للعمر لالا هذي تقيئات المر و عام طااااح على راسي حيرلي لي تجبر ..

قررت نموت منك و ندفن روحي بعيد عليك

قررت نخرج منك و نحميك نخليك ..

لالا نكذب عليك ما قررتش اما باش نموت .

مش تعبت و الا أيست اما نحب نوجعك ^^ ..

مش تعبت نحب نرى روحي في عيونك بدموعك ..

مش تعبت اما والله نكذب لا نحب نوجعك لا نبكيك .. والله نكذب انا كلمة منك توصلتي توة نفسخ النص و نرقد .. اما شنعمل انت توة بين أحضان الطبيعة و انا العشقة المخبية المطيشة في

اخر قجر بالطبيعه ..

تي لالا اسس بركا نعرفك تحبني و مستعد تعمل على خاطري كل شيء لدرجت انو لتوة لا غزرت في عينيك .. لمست ايديك بوست شفايف دفا ايديك كلمة مني ليك .. ايه ايه نعرفك تعمل

على خاطري اي شيء الا ااشيء لي نستنا فيه ..

يزيك مني ي وجعي مالساعة نكذب و معاود و حكيت كل شيء بالعكس و زدت و نقصت فسدت مصداقية النص .. ريت وين وصلت بيا معاك ؟ وصلت نفسد نص .

نحبك والله نحبك ي **** ..

متغشش مني ي عزيزي منجمتش نتحمل اكثر..

متتعشش مني ي روحي ما عرفتش نزيد نصبر .. كذبتش عليك كي قتلك راحتك و فرحتك اهم .. اما انا وحدي كالهم وين نحل يحل الدم و الخرم ..

انت من غيري محلاك عايش مع الطبيعة محلاك ..

سمحني ي وجعي منجمتش .. هذا يعني انيّ حاولت ..

تتفكر كيف قتلك اذا نهار قتلك باش نمشي راني باش نموت .. ايه شنموت منك و منهم .

متخافش تنجيك في الليل كي ترقد بعد ما تكمل المسلسل التركي و الفيلم البوليوي .. تو نجيك كي تغفى روحك و تولي ملكي .. تو نحكيلك عليا شصار فيا من غيرك ي ملكي .. انت الكبير

و انا الصغيرة لي مازلت مانعرفش تو نرجعلك كي نحير ..

لا بربي ما تتصورش مع اكا الريق باقي عليك نغير .. والبقية تعرف وحدك ..

متخافش في ما بعد الموت ماثماش غيرك .. يعني ما خنتكش ما مشيتش لغيرك و ما بدلتكش .. ما خترتش عليك راجل اخر و مش باش نتصور معاه و نبوسو من رقبتو نتفاخر .. متخافش

ماشية نموت وحدي .. كيما كنت قبلك

ارجع لوج عليا حير و اقلب الارض نقبة نقبة ..

و كان لقيت وقت ابعثلي مسج اما معاش تقلي رجعني .. انا باش نخليك في بلاصتك انا هي باش نمشي ..

لالا اخطى التفدليك عييت ..

نهار الطبيب والله تشقت الارض و بلعتني و لي بعدو الكل نفلم عليك .. شادة روحي بمصامر باش واقفه و نتكلم و نقولك لباس و انا ما الخلف فيا الرب تحت القصف المستمر ما يوفاش ..

كذبت عليك مرة وحدة قتلك لباس ي عزيزي الوجع بدى يخف .

لي يتفكرك و هو سكران عمرو ما ينساك و هو صاحي .. و انت حكيتلي ي عشيري قتلي شنية ذنبها ؛ نحبها ..

حبو بعضكم ي وجعي حبو بعضكم و اثمرو  ..

هذي مش وصية اما بربي لا تبطل تزورني و تسقيني كلام .. خاطر ماوصلني منك كان كلام .. معادش ينفع فيك كلام .. و لي فسد في روحيما يتصلحش..

----

فسدتلي النص .

نحبك ي **** .. قد ما انت اناني و مغرور قد وجيعتك كي هي خلاتك و قد ترميمي فيك و تصليحي .. قد كرهي للطبيب و قد وجعي الي ما نخبوش يوفا تعرفني وجيعتك نحبها ..

نحبك للأبد .