*كل ما في الأمر أنو نحن نستحقو نتحبو *

مهما كان شكلنا او لوننا , مهما كانت طباعنا او شخصياتنا , مهما كانت حالاتنا و ضروفنا , نحن نستحقو الحب بلا مقابل , الحب اللامشروط ..
الي ما تستنى منو شيئ غير انك تكون مطمان , و نعرفو نستغلو هالطمأنينة بالباهي , خاطرها نعمة كبيرة انك ترڨد الليل بالك مرتاح الي ثمة شخص عالأقل ماعمرو ينكرك و الا يرميك لسبب ما مهما كان هو ..
و عذاب كبير و شنيع انك تعدي ليلك محروڨ بين فكرة زعمة انا الشخص المناسب او انا مجرد تكملة ؟ انا المرغوب فيه و الا فقط المتاح ؟ انا رأس القايمة و الا مجرد سطر ؟ ..
هل انو انا كافي او انا جزء و ماعرفتش نكون إكتفاء للشخص المقابل ؟ هل انا عندي مكانة مستدامة ليا او انا على حافة السقوط ..

أسئلة حتى لو طرحتها اجوبتها ماتريحكش  و ماتكفيكش باش يجيك النوم , خاطر اي شيئ من  بعد ما تطلو توفى القيمة متاعو .. معادش ينفع .. دوى وفى وقتو ولا يظر معادش ينفع ..

على رأي فاطمه الشريف الي المرى المش متطلبة هي الي تستحق كل شيئ .. الي لا تشير للرغبة في اي شيئ مادي او معنوي او حسي .. كذلك الراجل ، يعني الانسان بصفة عامة .

الانسان الساكت راهو يستنى منك تبربشو و الا تبعد نهائيا ..
خاطر اخيب احساس في الدنيا الانتظار , الحريڨة الدخلانية , الحيرة , الشك ..
" و ياويلو لي يوصل يخلي مرى تشك في روحها في عينيها هي خاصة "
.. يوم لي تفيق الأنثى ماتهدا الا ما تهِد .. و يا حبذا ماتهدش روحها ..
خاطر شخصيا الصحوة عندي ما تكونش بداية , غالبا تكون نهاية شيئ ما , رغم اني مرى مانوفاش , يعني مانعملش نهايات لحتى شيئ .. ديما عندي فرصة اخرى و ديما دوسياتي مركونين يكملو بالوقت ..
هذي قوة .. و القوة ساعات تكون على شكل سكوت و ساعات على شكل بركان صياح و غريد .. نار تحرڨ كل شيئ .
هذاكا علاش الاساس انو نحبو و مانمارسو الا بالحب ..
كل شيئ العلاقات الاجتماعية و المهنية و الجنسية , مارسوها فقط من اجل الحب , باش توضفو مشاعركم .. خاطر كل ما يُصنع بحب يكون إيقاعو اعلى و اكثر فعالية ..

مانعرفش بظبط كيفاش شكل الاهتمام لكن نأكدلكم كل الطرق تأدي اليه ..

حبونا و الا اهجرونا نهائيا , ماتقبلوناش اذا بلاش محبة , ماتمثلوش علينا تقبل للاختلاف و الحرية و هاك الحديث المرتوب , موش صحيح .. و الله بلاش محبة منقبلو شيئ و مانتأقلموش و مانتعودوش و ما نعرفوش نعيشو .. نسكتو لــ يوما ما لكن ماناش مًسَلميـِن في حقنا في المحبة .

نقطة نظام : اعرفو قيمة الي عندكم و بين يديكم او اهجروهم للأبد , حد مايموت على غياب حد , لكن الوهم يڨتل , فضلا .

---
فاطمه عمري