نحبك انت كهو

Lina Khattat - لينا خطاط

في عمر صغير عرفتك..

تحلت عينيا عليك..

و تملى قلي بيك..

و حبيتك...

و ليت الطفلة الصغيرة الي تجننت بيك..

و من جواجيها تعلقت بيك..

و حبيتك...

جيتني و انا ضعيفة.. ضايعة..

حبيتك..

كيما الي لقات قشة تشد فيها و هي تغرق..

قويتني..

و زدت حبيتك..

كبرت و كبر حبك معايا..

سميتني ديامنتك.. و حبيتني.. لا مش حبيتني..

انت حييتني و من وجيعتي هزيتني..

تمنيتك و حبيتك ليا كاهو..

قلت نعمل كي أيوب.. و من صبري اكيد تتحل..

قلت نصبر و الصبر مفتاح الفرج..

ما نحبش نكون الوسادة الي تغلب الولادة..

نحبك نكونلك الوسادة الي تحبها كيما الولادة..

حبيتك...

و نحب نكسر القواعد الي عليك بعدوني..

و برى كان حبيتك و حبيتني..

شكانو يخسرو كان خلاونا لبعضنا..

و كل متتوحشني تجيني..

ولا نجييك..

و لا نقسمو الثنية و نقتلو وحشي ليك و وحشك ليا...

حبيتك...

و وحشك كل يوم يزيد..

أما توا عرفت..

أنا مانيش أيوب في الصبر.. و الصبر طال..

و الفرج مزال بعيد.. و الدنيا مش ضامنينها..

حبيتك..

و نحب نكسر القواعد الي بعدتني عليك..

لا حاشتي بفلوس و لا بذهب كيما يحبو..

نحبك انت كهو..

يقولو الحب ما يعيشش.. و ما يوكلش الخبز و ما يشريش الكوش..ههه

احنا محبتنا تعيشنا..

الصباح نفترو حب و القايلة حب و اليل زادا حب..

ماتخافوش ما نقلقوش مالحب..

و ما نجيوش طالبين العون...

و بنتنا زادا باش نجبوها بالحب.. و نوكلوها حب .. و نعلموها الحب..

حبيتك..

اجاني نبدلو حرامهم حلال.. و نقتلو الغول الي مخوفنا..

الصبر صحيح باهي اما احنا مناش أيوب...

حبيتك.

لينا خطاط

Website Design Brisbane