نتفكرك كي يرقد الحمام والقمره تبان..

يخرج السكران.. وتنبح الكلاب..

يرقد التاعب..

ويفرغ الشارع.. وشبعه ظلام.

ويتكى تحت الحيط اللي ما عندو فين يبات..

وتشد ثنيتك ليا، تدور تدور تدور وتروح..

تجيني على أطراف صوابعك تقول سراق..

أنا نسرق منك عينيك وإنت تسرقني من روحي..

ونحكيو..  

وإنت من أولك ما تحكيش وأنا ثرثاره..

وتحب كلامي.. هذا كلامك.. وما فيبالكش.. إنت طلقت لساني وخرجت مني حديث سنين..

أما قداش من مره كان الكلام فيها سكات وبرشا غزرات..

عينيك إنت شراره، ثرثاره، عينيك فضيحه، تحبلها برشا أقلام.. وأوراق وأوقات.. ونكتب نشكي نحكي نوصف وتبقى أزين من آش حكيت وآش نسيت..

وماك تتغشش مني ونتغشش منك..

ويدوان الكلام في فمك..

وكثر الدلال يخلف الهبال أما ندلل.

وتعمل عليا بالعاني وتجي تمركيني في "كي تتغشش تولي cute"

وتشيخ على غشي بضحك موت..

وتتفكر الحلزون والياسمينه والقطوس..

وتضحك.. تضحك.. تضحك..

وتشبعني حب ونشبعك عجب..

واللي كتبلك كتب، نار ومسمار وبرشا خنار.. وعيشه مرار وهذيكا الأقدار..

وما كيفنا حد..

وكيما جاء الباهي، جاء المشوم..

وأنا من الأول مسكره ببرشا أقفال صايبني حبك ببرشا هبال، وكيما قال الشاعر "اللي عندو ذهب ماو يخاف عليه" وأنا جيعانه ليك وما نشبعش، مسكينه ورزقت وجهك جريت خبيتو 

عالشمس وقفلت وضيعت المفتاح بين الأقفال.

وماك تحبني بالكيف ولا بالسيف..

وتقول نحبها ونقول نحبو..

لين يحكيو بينا الناس،

يعملوا حبنا مقياس..

ونتصنفوا على راس قائمة العشاق الكبار..

وتبقى حكايتنا خرافه للصغار.. هاك العام آش صار؟

ماو زوز حبوا بعضهم في زمان تخبل فيه الوقت، تخبل وتزبل..

نتفكرك كي نقلبوا الأوقات.. وبعد نصف الليل لا تسألني شنوا لابسه لا نولي fine، ونهبطوا حشيش وريش وما نوفاووش.

وروحت جناحي مكسر في ليله ظلمه نلحن في كلامي ونكتب.. "يا تمره من مكه أما خساره مليانه بالدود.. "نتليع وعلى حبك ما نتوب."

ونتفكرك هاك الليله، في تركينه من تراكنا وأحنا نتفرجوا على تصاور أول الحكايه، قتلي خلينا نزيدوا نتفكروا.. قتلك لازمنا الجديد..

شديت إيديك اللي نحبهم.. اللي تهز بيهم الرزين.. وتحرق بيهم الدخان..

وغزرت للأماره اللي في إيدي اليسار.. حرقة سيقارو هاك النهار وإنت تعلم فيا.. للمرة الألف، نقتل الشك.

وقتلك نحب ندور العالم معاك، وكيف كل مره طاوعتني وحلمت.. تهزني فين تمشي وأنا نتبعك فين تحب.

نتفكرك والحب قاعد يزيد.. في نهار مليان بالعرك، بالصياح، بغشي الصعيب وبغشك الأصعب.

ما نعرفش شنوا ضحكني وقتها.. يمكن اللي حسيت حبنا أقوى وبقية الدنيا تفاهات..

وأحنا في كفه والباقي في كفه وحكايتنا ما توفاش.

قتلك برا، أما نمن بلاصتك هنا.. "قص المرج والهرج، برا وما تلومنيش كيف نحولك حياتك جحيم.. نقتلك نشرب دمك نرتاح من همك ونموت بعدك.. ومحرم على غيري تحبك."

مشيت ورجعتلي عقاب الليل، بلمعة عينيك الحلوين.. وتمددت جنبي من التعب.. وأنا نغزرلك وعمال نزيد نحب..

وخرجوا من فمك كلمات غمضت عيني وتنهدت وحفظتهم بالحرف: "نعشق النهار اللي جيت فيه.. وما تستحقش تقتلني كان مشيت.. وحدي تو نموت"

وكان حبيت..

برا موت..

ماك يا عاشق ليا.. يا ممقوت.