منسيتش و ظاهر فيا منحبش ننسا .. منسيتش نهار لي بكلمه وشوشتها في حضني لسما عليتني و نهار لـ بسكوتك هديتني , منسيتش و ظاهر فيا منحبش ننسا

منسيتش لي انت الراجل الوحدي لي هديت فيا بقعه حد ما وصللها .. منسيتش لـي انت وحدك سكنت و بلا مقابل ترعرعت و ملكت الكل في الكل ..

منسيتش و ظاهر فيا منحبش ننسا .. نهار لي روحت من عندك في قلبي جرح ينزف في عيوني دموع تحرق .. روحت من بحذاك مكسورة .. روحت نندب في حظي لي جابني ليك و في

حلمي بيك ..

تعرف من نهار لي عرفتك لــ توة لا تدعى نهار ما نطقتش إسمك ؟ تعرف لي بالي ما يهداش و ما ننساش و ما نسكتش و منتهناش بلا متجي لبالي و نشوف زينك في خيالي ..

تعرف ي ولد الناس الطيبين لي عمري لا ريت فيك عيب و لاَ عمري باش نرى ؟

تعرف لي وجهي في عوض عيوني عندي زوز قلوب نشوف بيهم فيك وحدك ..

تعرف ي ولد الناس الطيبين لي منهار لي قلبي ما حن ليك لـتوة نتمنا فيك ..

لتوة مازلت وين نرقد نشوفك ..

من آخر من حكينا و يا ليتنا ما حكيناه هاك الكلام .. من آخر مرة عرفت فيها لي انت باش تتخلى عليا و تهجرني من وقتها سكنتني ..

خرجت من قلبي و سكنت روحي ..

تهلوست , مرضت , هزوني للطبه .. شربت دوى زرارق و حرابش و دوخا و غيبوبه و كلام في اللاوعي و برشا مر خرج من فمي و برشا سم بلعتو و سكتت ..

ي ولد الناس الطيبين علاه انا ؟

علاه جيت إنت و ماجيتش .

عــلاه ما كش ليا وحدي .. علاه انا نعيش بيك و انت عايش بخير بلا بيا ..

علاه ي ولد الناس الطيبين ما رحمتنيش ؟

ناديـــتك في ليل و في النهار .. ناديتك و ناديتك و ناديتك و عييت و انا النادي فيك و ماجيتنيش ..

بالرسمي جرب مرة تسمعني .. أسمعني كاهوو ممكن انا بعد ما نحكيلك كل شيئ نرتاح شواية ..

ممكن نفيق من تخديرتي ممكن نقوم من غيبوبة عشقِ فيــك ..

أسمعني و خليني نقول الكلام لي واجعني لي خانقني و مخلانيش نعيش ..

تعبــت .. برشاَ ي زهــو عمري برشاَ ..

المشكلة فيا موش فيك .. المشكلة في طريقة حبي ليـــك ..

ي حليلي ي ربي مكبر دايا .. "

ي حليلي لا عرفت نعيش لا نجمت نموت ..

منحبش نموت .. نحب نعيش معاك حتى نهار فيه برشا محبه و فرحه ..

منحبش نموت نحب نعيشـــــك و نعيشش فيك و بيك ..

عندي مدة نعشق فيك ..

في كل تفاصيلك .. في عيونك و غزرتهم و صوت ضحكتـك و لونك ..

منتفكرش مرة قلي حاجه مزيانه .. كلامك عيارو ثقيل .. عزيز برشا ..

مرات نقول ميسالش تو تجي الفرصه و تفرحني بــ كلمه لكن مازلت نتمنى ..

مازلت مازلت و مازلت ..

و منسيتش و ظاهر فيا منحبش ننسا ..

تي أي منحبش ننساك و علاش ننساك و انا نحب نعيش معاك ..

علاش ننساك و انت زهو بالي و سيد الناس في دلالي ..

علاش ننساك و نترحم منك علاش ..

منسيتكش و منحبش ننساك ي صـــبريِ الجميل .. ي كبديِ و مكابدتيِ .. يَ سَــنديِ و سِنديِ ..

منسيتكش و منحبش ننساك .. نحبش نعيشها معاك هالعيشه ..