مش عادي
Hiba Hamdi - هبة حمديعادي
كي نبات الليل نبوسك
و نصبح نداوي في جروحي و جروحك
عادي كي نضوڨ عسلك و دلالك
و نروح نوّح من حرارة كلامك
و وجيعة سهامك
عادي كي طفي في ڨلبي جمرك
و باقي نقلك تحت امرك
و نعطيك الطوع
و كلامك ديما مسموع
عادي كي بين الضحكة و الضحكة تسمع التنهيدة
و بين البسمة و البسمة تهبط دمعة جديدة
تلوج عالڨلب فماش ما طفي ناره
و هي تشعلا و تزيدا مرارة
عادي كي تحطلي حدود
و تقلي حبك في قلبي (يمكن) موجود
و انا ڨلبي ذاب و حبك مازال قايم
معمر روحي ، في عقلي دايم
عادي نعطيك الكل
و ما نخلي لروحي باقي
و الڨلب بحبك تاعب و شاقي
عادي تكون وجيعتي البنينة
و دمعتي قبل التبسيمة
عادي نقلك نور عينيا
كي عيوني تطفا في غيابك
و ما تشوف كان خيالك و ظلالك
عادي كي نبكي جرحك دم
و نتجرع منك لٱخر قطرة السم
عادي نرضى بصعبك
و ٱنا مخنوقة بغصتي ..
كي نغصت عليا فرحتي
عادي كي ندعي ربي
يفرج كربي
و يبعد عليا البلا
و انت اكبر ابتلاء
عادي و عادي و عادي
اما اللي موش عادي كي دور وجهك عليا
و انت ما ريت مني كان الحنية
موش عادي كي طيشني في شطر الثنية
و ما يوجعوكش الدموع على خديا
مش عادي كي تبجل عليا الناس
و انا ليالي نستنا و ما تعب الراس
موش عادي تقول ما نتفاهموش
و انا نتبع فيك بسكات البكوش
مش عادي يا حبي تنكرني
و في وقت الحاجة تهجرني
و من مخك زعمة زعمة تنفيني
ياللي سارق عمري و سنيني
مش عادي بالساهل تخلليني ..
هبة حمدي
Website Design Brisbane