في وسط برشات عباد ريتك ..
تي منغير ما خممت مرتين جيتك ..
لقيتك .. اي اي اي لقيتك ..
و من اول نظرة حبيتك ..
روحي سميتك و حبي فديتك ..

في وسط الحشيش كنت نت وردة ..
وسط خوماضة مخ كنت نت ابيض ورقة ..
كانو هوما طين و نت التربة ..
عينيك باب التوبة و انا جيتك ساجدة .. راكعة .. متيممة ب حبك ..
جيتك مليعة .. حلقة من حياتي مضيعة ..
خايفة نفورك ..
اما حالفة بالايمين بالقطعة بالقطعة ندورك ..
و نحفظك ..
و نحفظ كلامك ..
غشك ..
تخمامك ..
دلالك ..
تي حتى سبانك ..
نت جوجمة مشكولة .. طاولة سكرة مقلوبة .. صندرية دخان محروقة .. نت اكدس وراق و ستيلوات منصوبة .. مشكلتك طافي .. حافي .. عافي .. جافي .. وافي .. اما دافي و صافي ..
حبيبتك في وسط برشا حس ..
حبيتك تحت حس مس ..
خاطرك نت .. مكش هوما ..
خاطرك نت بحر و فيك تحلالي العومة ..
نت شهر رمضان و فيك نتبنن صومة ..
نت فرشي الدافي و نعشق فيك النومة ..
فيبالك نت عليا حرام؟
خاطرك حجر كريم و انا منيش على طهارة ..
تعرفش علاش؟
ماو على خاطرك مزلت كي قتلت اكا الكمشة النبارة ..
عرفتهم ماو؟
اكا الحفارة لي يحبو يطيحونا ..
و على بعضنا يبعدونا ..
اما تهنى .. انا ليك .. و عايشة على جال عينيك .. و ما تكملني كان ايديك ..
حبيتك و نحبك و ما نسلم فيك ....


أميمة بالحاج