- " نتمنىّ تهزك مني الموت و لا نشوفك مع غيري "

- " علاه لطف علياّ وين تدريِ والمكتوب؛ تحبني نموت ؟ "

- " جا لمخي و انت موش معايا كيفاش باش نكون .. وين باش نمشي لشكون باش نعيش و كيفاش باش نعيش .. اصلا لواش نعيش ؟ "

- " يزي م تخمام الخايب شمبعدني  عليك ا كَبدي  ؛ معاك و منخليكش و منسلّمش  فيك .. "

- " ... لكن انا موش قوية كيفك ؛ و انت تقليّ انا سيفك .. و من غيرك لا من يحميني ..  "

- " انا الروحْ الي  فيك حتىّ كان بعيد عليك ؛ حتى كان يغمنيّ قبر راني روحي تحميك .. "

-" ما يغركش اليّ  نعمل فيه ؛ انا مرىَ ما يغرينيٍ كلام ؛ و الكلام هو داياَ و اللعنه الي لابستني .. مرىَ وسط الظلمة نبقى ظلمة ما عندي غيرك دليلي و نور .. مرىَ بين الاحضان يديا للريح ممدودة  و ساقيا فالمروج غارقة .. ما يغركش انيٍ بكايا انا نبكي من كل شيء على حتى شيء .. ما تصدق فيا شيء كان عيوني .. و العيون فضيحه "

-" غدرنيِ الصبر عليك ي مرىَ من ظلمة و تشع نور .. غدرتنيِ عيونك و جابتنيِ بسيف عليا ليك ؛ ريح بين ايديك و موج شايخ بسقيك  .. هو انتِ في بالك الي انا سكران و صاحي انادي

عليك؟

غدرتني غمازة فمك  و شهتنيّ فيك حلاليٍ و نرسم فيك نوارةْ كيف ما يحلاليِ ..

غدرتينيٍ كي في ليلة صيف كالنسمة جيتيني  بين نوم و يقضة من يدي  لمستينيِ و بثلجكْ دغدغتيني  .. و لعندكْ هزيتينيِ .

العيون فضيحه ؟ عيونك وديان تجري في عروقي و منك و من غدرك ي خوفي ٍ .. نعرفك نساّيا و ما توفيِ .. "

- " جا لباليٍ كيفاش ننساك نسرح في العالم و منتمناك ، ننساك كيف ما عمري ما نسيتي وجيعة الفجعة علىَ خويا و الدمع لي حرقنيِ كي مرض بويا .. ، نساّيا و ما عندي في مخيٍ كان تفاصيل وجهك الطويل و عيونك بحرج حواجبك مزينين  ، خدودك المليانين و شفايف  باللمعه زاهين.. جا لباليٍ كيفاش ننساك و انا لا في داري لقيتك .. لا لو بنتيِ سميتك....

جا لباليٍ علاش ننساك و انا ما عندي فيا كان ريحتك و لتوة  في قلبي شاهيتك  ..

زعمه ننساك ؟ كي تغيب على عيوني و معاش ناراك و لا نحلم بيك لا نستناك  لا نعرف وجهك  لا تفاصيل سماك .. ننساك؟ "

- " نحب نطلب منك لي موش باش تقدري عليه .. غير مني اسمعيه • كي تتلفتي على غفلة و ما تلقيني  ميسالش تستنيني؟ كان مثلا في نهار مشيت و سنين بطيت ميسالش تستنيني؟ يعني عليك هنيني لا تعطي قلبك لغيري لا تنسيني..

كان انا عليك تخليتْ و هزتنيِ الاقوى مني و مشيت و عليك تخليت ميسالش ما تبكيش  .. ؟

مثلا كمليّ حياتك بأوراق و كلماتك  و على حلمتك ما تتنازليشْ المهم حتى من غيري خلي شعارك (لازم نعيش) .. و انا كان زدتي ستنيتيني و ماجيتش  ما تسكريش على روحك الباب و ما تبكيش كملي المشوار ما تسلّميش  .. "

- " هو انتَ صدقت  الي انا ننساك و حز في خاطرك و جا لبالك تمشي  و متجيش ؟

ي الدّنيا نكذب عليك انا ننسى سيفي؟ كيفاش ؟ و شكون بيا و بالي فيا ؟

نساّيا صحيح لكن انتَ موجود عاودلي و كل مرة نبدأ من جديد .. و هو بصحيح كيما قالت ام كلثوم " و ان كنت اقدر احب تاني ؛ احبك انتَ " ..

خلينيٍ نحبك ديما ديما و كل مرة من جديد بطريقة جديدة .. و كان انا قصّرت لمني بايديك حسسني بيك .. كان مخي ينساك راو قلبي مفتون بهواك..

كيفاش ننساك و علاش ننساك هو انا نقاوم في بشاعة العالم بيك و نصبر في روحيّ بعشقيٍ فيك ..

ما تمشيشْ .. كثّرت عليك و ضيقت الخناق عليك ؟

نهواك و من ضو الشمس نغار عليك ..

ما تمشيشْ ؛ غيبتك  علياّ ماعنديش ليها الصبر ..

نحير  و ما نعرفش منين نبدا الحكايات وحدك انت لي تعرف ؛ تعرف تخلينيِ مرىَ مزيانة ماغير زينة.. تعرف تفهّمني شلازمنيِ نعمل بغزارة عينيك .. انا اليّ نطمان بيك  و ما نخممش في غدوة .. نعرف معايا كتف تتهز الدنيا و هو يبقالي ساندنيِ  ..

ميسالش كان تبقالي  ديما و ما تمشيشْ ؟ "

-" مازلت  نحب نقتلك و منشوفكش مع غيريِ " .

فاطمة عمري