ما تلوم زمان
Ali Hmidi - علي حميديتفكّرتك ..
على غفلة مالوقت، سْرقت منّو سوايع.. و جيتك ..
على غفلة من الزمان قلبي عطيتك .. ما ننسى وعدك ..
كي قتلي ما نحب حتى واحد بعدك ..
و حبّيت بعدي..
و بقيت انا ضايع ..
(...)
و عرضتني في يوم و انا رايح..
صدفة كي طلع طريقي هو طريقك..
بعيني ريتك ..
تبدّل في الخطوة مع صاحبي الخوّان..
ما عليه ملام ..
اللوم عليك ..
غدرتني، وخسارة فيك و فيه ..
نخاف عليه ..
الوجع اللي ذقتو، يذوق منّو وجايع ..
(...)
تبّعتك بعيني..
إيدك في ايديه تهزّ، لكتفو تلزّ ..
و ضحكة في عينيه ريتها مرسومة ..
يرى فيك جنّة ..
و حب و برشا غرام.. كيما تمنّى ..
مازال ما يدري افعالك المشومة ..
و الضلم اللي من عينيك فايع
(...)
و هزيتو ..
نفس المكان اللي فيه قعدنا ..
و ياما قعدنا ..
حكينا و فرّغنا قلوبنا لبعضنا ..
على اسرارنا تكلمّنا ..
و تفاهمنا ..
اللي القدر اكبر منا ..
ودّعتني ..
مشيت وحدي و دمعتي غلبتني..
خلّتني ..
كي طفل صغير بين الهموم لايع ..
(...)
اخطاك منها ..
يا صاحبي ..
كيما تخلّات عليا غدوة تسيبك ..
ترميك عليك ما تسأل ..
و تقول هذا نصيبك ..
تشريك زيد تبيعك ..
هذة طبيعة الانسان ، كي يخون مرة ..
يخون بعدو الوان ..
و يبقى كلام ..
اللي يحبك غدوة يجيك يملا ربيعك ..
و يعود كيما كان ..
ما تلوم زمان ..
ولا تلوم الوقت .. و تلوم اللي حبك بايع ..
اللي خسر عليك لحظة ..
ما تبيع عمرك و ما تخسر عليه سوايع ..
علي حميدي
Website Design Brisbane