الحكايه الكل بقيه حياتي كاهو ..

الحكايه الكل إنت و دفئ إيدي   ..

عندي مدة مانرقدش إليل بيك نتوجع تحسني باش نولدك و وجيعتك محﻻها و مأكثرها ..

عندي مدة نبات حيه ، نخمم في ليلتي لوﻻ بيك كيفاش ..!

نخمم في تغميضت عينيا ، تفوتني غزرة في مﻻمحك ..

مرات تستغربني .. عﻻش نغزرلك هكا ..

نبدى غارقه في مﻻمحك ..

في وجهك و التحفير لي ماليه ، في لحيتك و هملتها على خدودك ، في شفايفك الصغار ، في التذبيلة الربانية لي في عينيك ، في شكل حواجبك و سموريتك و شعرك الأسود ...

نغزر لعيونك لي ينقطو عشق ، عيونك لي تحكي كﻻم محﻻه ، عيونك ڨداش من مرة تڨلي لي هي تعشقني ..

ڨداش من مرة حكينا بالسرقة عليك ..

مرة ڨتلك عندك غزرة متربعه في وسط ڨلبي ..

______________

مرة و انا نبكي و نصيح و نحكي في كﻻم درا كيفاش و نرعش بالعصب و نبكي .. و انت تحاول تلمسني باش تهديني و انا نبعدك عليا .....

اي واعيه لي انا نبعد فيك ، خاطر كنت مستحقه موش لمسه ، مستحقه حضن "))) !

و أول ما هديت و غزرت لعيونك نلقاك عيونك حمرى متفهمتش حابس دموع و اﻻ عصب .. لكن بقيت نغزرلك شوايه و انا عيوني غارقه دم .. عمتلي همسه بحواجبك و غزرة من عيونك و نلقاك

عاودت تحب تجذبني و تحضني ..

و غطست بين ايديك نبكي .. نبكي مالفرحه بالموقف نبكي من الحضن لي تحرمت منو سنين .. نبكي خاطر نحبك ")) ..

________________

خاطرك سيد الموقف و مترضاليش النسمه القوية ..

خاطرك الوحيد لي حبني رغم شكلي القوي برشا المتعجرف برشا في الفترة اذيكا ..

خاطرك عرفت ترضي البنيه لي عايشه فيا ..

خاطرك من نهارتها وليت معادش تحكي برشا كﻻم .. وﻻت عيونك تأشر و ڨلبي يفهم ..

خاطر الغلط لي فيك الكل نتجاوز فيه .. مدامني نحب على ڨلبك ..

خاطر في برشا مرات ڨتلي كﻻم موش باش يجي حد اخر ينسج مثلو ..

بسيط لكن منك كبير ..

خاطر نجمت نتأقلم معاك بعد ما حرمت على روحي الرجال ..

لكن إنت جيت في شكل بو  ..

____________

نتفكر مرة نحكيو سألتك 'شنية احﻻمك ، طموحك .. شنية تحب تحقق في المستقبل ' ؟

نتفكر في نفس الثانيه جاوبتني : ' طموحي نفرحك و نحققلك حلمتك .. إنت طموحي ' ..

ماثماش حتى حرف و اﻻ كلمه و اﻻ غنايه و اﻻ أي تعبير ينجم يفسر شنية حسيت وقتها ..

( حتى لو هو كﻻم وقتها انا حييت )

...

عندي مدة نتفكر في كل كﻻمك و انت معايا في غزرت عيونك و شكلك و صوتك و لعبنا و فراعنا ..

عندي مدة نحبك تجيني ") ..

إنت لي ناديت عليك و كنت ديما تسمعني ..

إنت لي حبيت عليك بعدما حرمت نحب ..

إنت العشقه الأخيرى ..

عندي مدة نتمانا فيك عندي بين ضلوعي غادي من حضني .. أقرب من بدني ..

عندي مدة شاهيتك في حﻻلي ..

أي شاهيتك ، عﻻش ﻻ !

نحبك ، بروحي و ببدني و ب كﻻمي .. بعفويتي و اغﻻطي و كل شيء ..

عندي مدة نستنا فيك إدفي حضني و برد ايدي ..

لو جيت تسمع في لي نڨول فيه راك جيت ، تجيني و ترمي الدنياَ وراك ..

منحبكش تسمع كﻻمي و منحبكش تقرى حروفي خاطر ي خوفي اول ما تاقف قدامي نجمد نهلوس نخاف .. نبطل شهوتي و غرامي .. "))

#شقولك فيا ؟ ما تڨولش عليا شيزوفران راني مرىَ تحبـــكْ .. لكن خايفه .