هايا تعرف كيفاشْ ! هذي صفحة و تطوات و الي حكيتو عليك ادفنو تاريخي معاك احسبو مات ، وحدي بغصتي ذبحت عرق  العشق الي معاه القصة وفات ..

بالسكات نقطع في الصفحات ايامات سكوتك و كﻻمك الهمسات .. ليالي صوتك و الغمرات .. حتىّ حسك و الكلمات ، يزي احسبو مات .

بالوجعات غصرة إجهاض حلمة و سال دمها و تنحات ..

بالعقل يزي منك تعبى الكاس و فاض التنشرت و تبعثر المخبي و معاد فيه ما يربط الحبل الي بينك و بيني كل شيء قاعد ينتهي و تشل ..

بال ڨلب ﻻ نحدثك ﻻ نوصفلك خدرتو سكتو موتو غميتو في عمق جبل حطيتو ..

عندي سنينْ نحس في روحيِّ نقدم و نعمل دورة و نرجع م لول و نعاود و نرجع منين بديت ، نرجع وين في ظلمة مشيت و وحدي بكيت و حتىّ كتف ما لقيت .. نرجع نتفكر مرضتي و هبلتي وين مسكرة على روحيِّ بيت ..

وقتها ناديت عليك و ﻻ جيت ،  ستنيتك و صبرت و عاودت عملت الدورة و رجعت م لول و ﻻ جيت ..

ڨدامي بحرارت روحكْ ل غيري مشيت و تبكي الليلْ لي بكيتو و تسهر الليالي لي سهرتهم و تنادي و ﻻ من سمعك ..

الرب و ما خلق يعلمني و انت ماعلمتنيش شفتني قربتلي غزرتلي في عنيا و ما رحمتنيش و كلمة تصنع الفرح ما ڨتليش .

" ﻻ سماح ﻻ غفران و معاهم الڨلب غضبان ..

ﻻ كﻻم ﻻ مﻻم يومتها عند الحساب تو نجيكْ نهز حقي و ﻻ نكلمك ﻻ ناديك .. " هكاَ في بالك باش نڨول عليك ؟

ﻻ ي زهوٌ باليٍ عيش و افرح و هاك ڨدامي ﻻ تضيع ﻻ تسهر ليالي ..

و تعرف كيفاشْ برى السماح في موعدنا و ضيقت حالي ..

سماح فيك جمﻻ .. شوف ما يريح بالك و ديما في غسق الليل ندعيلك و الراحة نتمنالك .. لكن لي ما ينام الليل ما يغفرش حتىّ كان أنا غفرت  ..

نكتبلك و انت عيونك ما تشوفنيش .. لكن يكفي إني نعيش الفعل .. و نمحيك مع كل مرة نكتب بوجيعة الروح .. يكفيني إني مع كل حرف نتخلص منك أكثر ..

و لشكون تحرقصي ي مرت لعما ! ﻻ لطف عليك مالعمي ..

نحرقص ل ڨلبي لي عندو زوز عيون .. لكن اليﻻ ﻻزم نطفي عيون ڨلبي منك و نبدىََ ..

ي مصعب النقاط على الحروف و مرزنها ..

تعرف كيفاشْ !

نحبك ياسر و العمر حبيتك مرة و من نهار لي عرفتك حبيتك ثﻻث مرات .. مرة و انت معاياً و مرة و انت وحدك و مرة و انت مع روحها لي عايشة فيك ..

ايه نحبك برشاَ مرات و بطريقة يجيك نهار تندم عليهاً ..

و الحب ما يخفاش و على العين ما يتحاشاش ..

يتقرى و يتسمع و يترسم و بحروفي يتكتب ..

يزي اي .

تعرف كيفاشْ !

الصفحة احسبها تطوات و الي حكيتو عليك احسبو تجمد مات .