"ابقِ معي حين أكون مخيفًا وحادًا، حين يهرب الجميع من حولي لفرط حماقتي، ولا أملك أحدًا سواك."

أكثرية الوقت ماعنديش وقت باش نفسخ اليّ فات ، نتناساه و في اول عثرة يتزعزع كل شيء و يتكبّ قدامي ..

لي حبونيّ و لي حبيتهم و خاصة الثانية خاطرني انا منحبش حد اما نحب المواقف و الاستثناء و الفاسد .. نحب المتروك ، الصعيب ، المسكر المجروح ، نحب الدم و الكتيبة عالهمْ .. الغامض و الساكت و المثير و الأناني ..

نحبهم بصدق يعني مش زيف ، و اول ما نكتشفهم عن قرب نبطل و نبقى نتفرج على الدنيا كيفاش باش تعمل معايا .. كيفاش تلمهم الكل و تحطهم في خانات المرغوب الممنوع الي يتبلنجا كان وقت توفى حاجتك بيه ..

كيما نقولو نحن تجيك الحاجه وقت معاش حاجتك بيها اما تلقى بلاصتها مازلت فارغة ..

كنت نحب نقرا علم نفس و انا اعرب مريضة نفسياً ..

حبيت برشا نجرب العمل السياسي عن قرب كيما النضال الشبابي و اكا الافلام الثورية و الأكيد اني لا ارضى بأقل من أدوار البطولة ..

كنت نحب نكمل نكتب روايتي "إمرأة لا شفاء منها" و نشوف ردود افعال الي باش يقراو .. الي باش يشوفو روحي في كل سطر و كل كلمة ..

كنت نحارب في المرض و نبينلو اني اذا حطيت حاجه في مخي باش ماتغلبنيش راهي بالحق ماتغلبنيش .. الا اني من كثر القوة تكسحت و تصلّبت و بطلت العلاج على فرضية إني ماعادش يهمني ..

كنت نحبّ برشا بكل نقطة دم فيا نفارع العالم على حاجه حلات في عين قلبي و نفكها .. حتى كان كانت مش متاعي تولي متاعي مدامني حبيت عليها ، أما فيسع نبطل و نقلب الصفحه و نتعدا و لا كأني خممت في

الموضوع ..

على فكرة ما تعجبنيش فكرة إنك تلوّج على روحك في حروفي و في تفاصيل كلامي .. مانحبّش تقيس تجربتك على حكياتي لي ننتج فيهم في نصوص .. خاطرني نهتري من فعل العالم فيا مش بظبط الكلام يوصفني و يمثلني ..

أنا المرى الوحيدة ممكن اليّ اذا ما صارتليش حاجه تثبت وجود الحزن فيا نحزن على الثواني تاع الفرحه لي تتعدا على غفلة من القدر ..

لي يحبني يعرف بالباهي إني لا أفتعل المشاعر ، ضميري في معدتي و اعصابي فالتة منخي ، الكلمة عندها وقعها فيا و الموقف هو الفيصل ..

أكثرية الوقت نتسبب في مشاكل بالقصد و بدونها ، كيما إني اغار على ما لا املك؛ لااا مش غيرة الحسد .. غيرة الفرصة الي جات و ضيعتها وحدي .. خاطرني كول الوثت نبدا نخب نكون وحدي و كيف يبدا معايا حد نبعدو عليا خاطرني مش عارفة نعيش الا وحدي .. شقولك ؟

مانيش أخت حد و لا نحب حد يحبّني  .. نحب تلبسو وجوهكم فقط .

ما تبدلتش .. ظهرت مازلت هي نفسها انا و الا ممكن اخر ميزاجور فياّ سايي صار و سبحت العقرب متاع ساعتي لنا ..

انا اليّ  مانلوجش عالمحبة جملا ؛ نلوج عالامان ..

نحب نحط راسي نرقد يهزني النوم ماغير تخمام و لا تكسير راس و اوهام ماغير مانشوف كوابيس في المنام ..

نحب نرقد و كاهو ..

خاطرني تاعبة و حالة الحب الي عايشتها ماعندها حتى علاقة بتعبي ..

انت راجل مُتعب و انا مرى تاعبة .. لهذا نحن الأفضل مانكذبوش .. نعنقو بعضنا بالدموع تاع هدت الجبال و وجيعت العمر ..

انت راجل القلب فيك حيّ فياّ  و انا مازلت .. مازلت باش نقاوم و نفارع كيما كنت وحدي ..