قبلك بظبط ما كانش عندي أسرار ؛ ولا حكايات فالظلمة      

درڨة على عيون ناس ، قبلك بظبط كنت واضحة كي ضو النهار  ، كل شيء فيا ناقط فاطق ، عيوني تفضحني جهار بهار ..

قبلك بظبط كنت نكتب الفراغات بالكلام المليان من روحي  .. كنت نزرع الملح في جروحي ينبت صباّر يظلل عليا حرڨت الشمس ، قبلك بظبط عندي هنا في حمايل صدري كواغط مكتوب فيها تعويذة من شخص كيفك ..

ڨتلي عليها داد الحناّنة ..

"أ طفلة لي دعا عليك دعثراتو لياّم طاح جا مادد يدو ليك "

مافهمتش لكن حسيت ..

قبلك بظبط كنت لا نرڨد لا ليل لا نهار ، نسهر نستنا فالنهار يجي طلع الشمس نسرح خاطرني نخاف الليل و الظلمة ..

قبلك بظبط كنت ما نرجعش و ما نغزرش ورايا ، نمشي وين تهزني عيوني مادامها فايقة و مخي حيّ ..

قبلك كنت نرسم الضحكة من ڨلبي على ڨلوبهم و نفرح بفرحتهم ..

قبلك كنت مُسالمة في وجهي و الحرب قايمة في ڨلبي ..

قبلك كنت نستنى في انيّ نعيش ليلة ..

و سبق كتبت " ليلة من عمر تكفيني؛ لو حتىّ ليلة" ..

و من قبلك  لا ليل عندو معنى و لا نهار يصلح لحال .. و طال صبري ..

قبلك بظبط كنت وحدي ياسر و تراكني باردة ..

لهنا بظبط كان حد ما يعرف قيمتها اكا الزايدة علياّ ..

لهنا بظبط كان حد ما يعرف طعمتها اكا اليّ جديدة عليا ..

لهنا و لهنا و لهنا و يدّ الدفى ..

قبلك كنت محلاني و مش عارفة علاش و كنت حزينة و منعرفش لوقتاش ..

قبلك كل شيء كان مخلوض و مخلبز لكن شاد بلاصتو ..

قبلك انتَ صبرت برشا و انا  واقفه كيف الجبل شامخة ..

قبلك انتَ صبرت لي تصبّرت و شوكي نبت و ماعاد حد يقدر علياّ ..

قبلك بظبط كنت نعرف نكتب و نعرف نحكي ، نعرف نخفي برشا كلام بين السطور ..

قبلك ؛ قبلك ..

قبلك الدنيا باهية ، تمشي فوق ظهري تنهش من عمري تنقص من عدادي ..

قبلك صحابي ياخذو مني مصلحتهم يلوحوني يضحكولي و في غيابي بالعيب يودوني ..

قبلك كان لكل مكان معنى و لكل كلام تفسير ..

قبلك كنت .. و مازلت .

-

ولادتي بيك كان عسيرة .. عسيرة حد اني تخيلتني باش نموت و تعيش يتيم الأم بلا بياّ .

و من بعدك ، انا كيما انا الا انتَ الإضافة  ؛ من بعدك كل شيء كيما هو الا انت عابر سبيل سرير ..

مش قتلي " لڨيتك فرحانه و مرتاحة ياخي قعدت" ..

فرحانه ما توصفش حتى شيء و الراّحة جابها العابر ..

-

حديث مانحبش نكتبو ، نحبّ نخبيه في تراكني يدفيها يذوب ثلجها من روحها يحميها ..

-

من قتلك مرة انتَ : " كل شيء " كل الفراغات انت َ .