سعدي سعد و سعدي سعد و عندي ولدي خير من ألف ولد سعدي بيه سعدي بيه أما الوحش قطع قلبي عليه .

الوحش وحش و ولدي صغير و حتى في ماكلتو ما يحير لا لا ولدي شخنان،  وليدي الغالي ما يحب كان الحاجة الباهية،  صحة عليه و كل شيء يواتيه ، خمسة و خميس عليه أما زعما شنيا حالو و حوالو  ...

زعما بردان و إلا متغطي،  زعما كلااا ، إن شاء الله ما تكونش الماكلة حارة نعرفو ما يحبش الحار و إن شاء الله موش صفراء ماصطة نعرفو ما يحبش الحار .

الوحش وحش كبير يا وليدي و إنت طفل الصغير  و الطريق إلي مشيتو في الدنيا قصير يا كبدتي قدامك دروجات و صعادي خوذ نفس و أخزر لخطوتك مليح مليح ،

يا روح ماما توحشك و توحشت ماما من فمك  كيما نعرفك توحشتني  و توحشتنا، توحشت فرشك و بيتك  ، ريحة الدار ريحتك و حيوط الدار تناديك و كل ركن يسألني عليك ، نعرف وليدي الباهي ما يطيقش الوحش  و الوحش وحش كبير   و وليدي صغير  .

يا وليدي الفراق صعيب و فراق الكبيدة أصعب .  الليالي طوال و ليالي الشتاء أطول و الغربة صعيبة و فراق ماما أصعب و البعد خايب و بعد الصغير في أول حياتو أخيب .