كيف تتعب و ما تلقاش طاقة حتى باش تشكي شبيك، كيف معادش تلقى ما تقول و تعمل و منين تبدى، كيف ما تلقى ما تصلح و تعرف إلي حد ما باش يفهمك ولا باش ينجم يعاونك.. كيف أقرب الناس ليك تولي تتصرف معاك بطريقة جديدة إنتي مازلت مافهمتهاش و ماتحبش تفهمها طامع تقعد تحس بالأمان.. خايف من المفاجآت إلي تجم تكتشفها كي تلوج باش تفهم..

كيف أكثر إنسان حبيتو و ضحيت على خاطرو و فرحان بيه و تشوف الدنيا بعينيه و تقول كل شيئ يهون مادامنا مع بعضنا .. تاقف تخمم و إنتي داجا تاعب تقول علاش كل ها الطاقة ؟ علاش أنا نحيت صحابي و بدلت من روحي و عدلت حياتي على خاطرو و هو لا ؟ علاش حتى و انا متغربة مفضية روحي ليه باش هو ما يتقلقش ؟ علاش أنا نكذب و نغطي على عايلتو و عليه باش يقعد في أحلى و أبهى صورة .. و هو ؟ ..

علاش أنا كيف تاعبة و نكلمو و غصتي في قلبي هو يقلي تاعب و نحب نرقد ؟ علاش كيف يحس الي صوتي مبدل ما يسإلنيش علاش يا وجدان صوتك هك ؟ شصار لمرتي في غيابي؟ علاش كل إلي عملو إلي يقلي الكلمتين إلي سنستك أنا بيهم نرجع نضحك و ما نقلك شيئ ؟ علاش كيف تعرف إلي أنا مخليتك على راحتك و نقرى حساب الدقيقة إلي تنجم تكون فيها فاضي و لا لا إنتي ما تكلمنيش و تقلي هاني وصلت، هاني مشيت ، هاني متفاضي تستحقني في حاجة ليامات ماكنتش لاهي .. علاش كيف كل مرة أنا نجي نقلك الحاجة هاذي باهية و هي مازلت موش معروفة إنتي تقلي لا حكاية فارغة و ماريت حد يعمل فيها.. يتعدى وقت و تولي حتى الجبورة تولي تحقرها الحاجة هاكي تجيني تقلي ريت يا وجدان هاذي و هاذي.. نفكرك بكلامي والنهار الي قتلك عليها تقلي "يمكن" ولا "نسيت" ؟ علاش كيف أنا نبدى نفرغلك في قلبي و نشكيلك حتى من أمي إنتي تفد و تمل و تولي تحب ترقد ؟

علاش أنا نقلك "بطل" و نزيدك غرور و ثقة ؟ علاش أنا كيف نخمم في هاذا لكل إنتي تبدى عايش حياتك عادي و فرحان ؟ إنتي وينك وقت أنا مقهورة؟ إنتي وينك وقت أنا غايظتني منك برشا حاجات كنت تنجم تعملها و ماعملتهاش ؟ إنتي وينك وقت أنا وصلت قتلك راني سبحان الله في كل مرة أنا نقرر نبعد عليك و نطيح عشرة خمسة سنين في الماء ؟ إنتي تقلي "وإنتي وينك وقت البرد كلاني " و تضحك ! تضحك خاطرك عارف أنا نشعل نشعل و نبرد وحدي.. أنا نتعب نتعب و نلم روحي وحدي.. خاطرك تعرف الي انا نموت و لا نخون انا نموت و نحارب على خاطرك .. خاطرك تعرف الي العالم حاجة و انتي حاجة اخرى ليا... خاطرك تعرف الي انا كل شيئ الا نخليك و تخليني.. خاطرك تعرف الي أنا حتى حياتي الخاصة عندك .. خاطرني شادة الدار كيف الطفلة الصغيرة الي تستنى بوها يتفرغ باش يفرهدها و يحوس بيها... خاطرني ذليت روحي و انا نحب فيك ... خاطرني نخاف عليك مني.. خاطرني وصلت عطيتك خاتمي و قتلك وفى كل شيئ و عينايا تبكي و قلبي موجوع و انتي تغزرلي و تضحك.. خاطرني انا إنسانة نصلي و نخاف ربي فيك و حافظتك في غيابك و حضورك و ساترة روحي و خاطرك إنتي تحوس معايا و عينيك مرشوقة في الماشية و الجاية و فلي شعرها أصفر في الفيات و فلي معرية صدرها في الإنستغرام و خاطرك تعرف الي أنا في كل مرة نشعل نار من غيرتي عليك انتي تقلي "انا نظيف" و "هاك التاليفون شوف" خاطرني انا ما نسمحش لروحي نشوف تاليفونك.. علاش كيف نسألك على حاجة نتأكدة الي إنتي عامل فيها حاجة تغششني ما تعطيني منها صرف من عدل و تقلي "تي نسيت " ، علاش كيف نزين روحي و نقد كل الي تقولهولي هو كل مرة نفس الكلام.. و انا نبدى نستنى في أكثر؟ علاش وصلت نفقد عصابي معاك أنا الطفلة الرزينة ؟ علاش حياتي تبدلت للثنية هاذي وقت انا كلي الي خترتو هو راجل حبيتو من اول ما ريتو؟ علاش كيف نحكيلك حكاية و لا معلومة ما تصدقنيش فيها و تستخف بيا و تقلي "تي يزي يا بيجو" علاش كيف نبدى نستنى منك باش تشجعني على حاجة كل الي تعملو هو تسالني شباش نعمل و شنوة جديد في الحاجة هاكي ؟ علاش انا كل الي حبيتو الي أنا نكون كل شيئ في حياتك و طلعت بعد راحتك و كرهبتك و خدمتك و عليلتك و الترجي و برشلونة ؟ علاش ما تجمش تفهم المرات الي حاولت نفسرلك فيهم قبل ما ناخذ قراري هاذا ؟ علاش ما عرفتش قيمتي قبل ما يفوت الفوت ؟ علاش صحابك يقولولي في غيابك و الله صحة عليه طاح بيك ربي يحن علينا و انتي وليت ما تقلي نحبك كان ما أنا نسألك و لا انا نقلك ؟

علاش أنا إلي نجري في جرتك نحب نرضيك من كل النواحي (وانتي تعرف شنقصد)وإنتي لا ؟ علاش في بالك إلي كل شيئ انا طالبتو منك مادي و يتكلف و صعيب و آخرها تقلي "ولو كان الكلام يعبر عن الحنان كنت قلت إلي أحبك من زمان" علاش كيف نمرض نتعارك معاك باش تجيبلي ورد و طل عليا ؟ علاش كيف نروح من الغربة نتعارك معاك باش نمشيو نفرهدو؟ علاش الإهتمام في كل مرة أنا نطلبو و نندم ؟ علاش ذليت بروحك يا وجدان ؟ علاش كل ما تكلمني تتحصل عليا ؟ علاش كيف آخر مرة طاحت بيا الكرهبة بان في الخلاء ما سألتنيش تحب نجيك؟ علاش كيف تخنقت في صفاقس و حطولي الأوكسيجين ما قتليش تحب نجيك و كيف عاركتك بعدها قتلي "والله كنت باش نجيك اما قلت زايد" علاش في كل مرة نقلك قول.. انتي غير قول اكهو راك تبعد على الحاجات الخايبة الي نجم نخمم فيهم تقلي باهي و في ليلتها تنسى؟ علاش كيف نقلك مرات هاذا كان عرسنا تضحك عليا و ما تسألنيش علاش نقول هك شبي إحساسي سلبي ؟ علاش كيف حكيتليك على إحساسي السلبي قتلي "كيف نعرسو حاجة أخرى" ؟ علاش تمني فيا بحاجات إنتي ما تجمش توفرهملي تو ؟ علاش كيف نبعد على أفكاري هاذي لكل و نتخبى في صوتك في التاليفون بعد نهار طويل و انا نستنى فيك تقلي "يعني انا خايب؟" ولا "يعني انا مقصر؟" ولا "باهي هاني تو باش نتبدل" ؟ علاش ؟

علاش ركبتلي الخوف و الرعب منك و من كلامك هاذا ؟ غدعلاش واثق الي انا ليك و مانجمش نبعد ؟علاش آخر مساج مزيان بعثتهولي وحدك في وحدك قبل ما نسافر، سبعة شهور لتالي خاطرني مسافرة و خايف مني ؟ علاش ماكش حابب تعطيني ثيقة ؟ علاش أنا بالنسبة ليك ما نستاهلش الكلام و التعبير و الإهتمام ..؟ علاش ما تعمل معايا كان الواجب ؟ علاش كان باش نحكيلك هاذا لكل باش تقلي "هاذا لكل على خرجة معا صحابي؟ على خاطرني نهار كامل نكلت باش نخلطو نعرسو و نبداو مع بعضنا؟ خاطرني عاقل ولا خرجات و لادخلات و لا صحبات"؟ علاش باش تقلي هك؟ علاش باش تندمني الي انا حليت فمي و شكيت ؟ علاش كيف قلبي قريب ياقف و انا نلم في طروفي باش ما نقلقكش بكلامي إنتي ما تحسنيش ؟ علاش باش تقلي " انتي شنوة تحب تو"؟ علاش باش نزيد نحس بالذل و تغيظني روحي خاطر و انا بعيظة عليك و متغربة انا نطلب منك في الإهتمام وقتلي المفروض العكس؟ علاش أنا وحدي التاعبة و إلي "نتسبب" علاش وحدي نبكي و متروكة كيف اليتيمة في دار بابا نستنى في ربي يعطيني معجزة؟ علاش أنا قد ما سهلت عليك العرس باقي انا مقصرة و "موش كان السواحلبة بشريو الغاز و الفريجيدار و بيت فطور"؟ علاش أنا للمرة الثانية ما تهديليش حتى وردة كيف ننجح نطلع بسها راسي قدام عايلتي ؟ علاش أنا نكذب عليك و نهدي لروحي حاجات و نقول من عندك ؟ علاش انتي تقلي "كان جيت كهاكة تو منعرسوش"باش تقلي كان نزيد نذل من روحي و نقلك ؟ علاش أنا كل ما أمك تشعل فيا أنا نجيبالها بوكا ورد و شكلاطة ؟ علاش أنا قدام عالم و الناس نقلك بطل و نفخر بيك و انتي حتي بيني و بينك ولا مرة قتلي الي انتي فرحان الي انا مرتك و لا الي انتي معايا ؟علاش باش تقلي الي "هاذي مشكلتك عاد انتي ماتحسش؟"

علاش باش تتعب و انتي تقرى و تقول عطلتني على تكويرتي و "انتي شنااايااا مشكللتكك تو ؟؟" و انا نندم الي قتلك؟ علاش انا قررت هاذا و انا "ظالمتك "كيف ما باش تخمم تو ؟ على خاطرني ذليت روحي .. على خاطرني حبيتك من كل وجداني .. على خاطرني رديتك حياتي و قتلت روحي و تو نقلك إلي إنتي "بطل" اما انا الي فاشلة فاشلة مع روحي قبل ما نكون معاك.. انا ما نجمش نكمل معاك. سامحني. اي "اموري" كيف ما تقلي انتي.