'عندي برشا طاقة سلبية ڨلت علاش لا نقسموها'

ماتستغربوش عاد انتم بطبيعتكم تحبو تقسمو كل شيئ و اذا ما قدرتوش باش تقسموه معانا تفشلوه و الا تقزموه تحطوه ..

اذا ما نجمتوش تفهوه .. تصنعو منو حاجة ياسر باردة كي ڨلبي , ياسر ماسطة كي سمي و ياسر حاذقة كي امي .. 
تردوه هامد ما يتحركش و يغفق ما يتنفسش , ترجعوه يغص و يبلع ما يتكلمش , تصنعو منو غيمة سودة , سحابة رزينة ما تمطرش , كـ عاقِر لا تفقه الرضاعة , كـ أرملة تتوسد زنودها و ترڨد .. 

كيما كل شيئ خايب , كي الي في عز شبابو شايب , كالصبية لي في معشوقها تستنى و هوا موش باش يتحرك خاطرو عايب ..
كالموت و الموت ماترحمش .. كالصبر و الصبر ما يوفاش , كالدموع و الدموع ما تعياش , كالحضن و الحضن جامد ما يدفاش , كالحرب بين العرب الي ما توفاش ..

تحبو تقسمو الي نحبوه , ايه عاد شبيه نحبوه جميع , خير ما يكثر دلالو و يميع ..
نقسمو لي نشروه مريول بزوز يدين , يد ليك و يد ليا .. و ماكم علمتونا اليد الوحدة ما تصفڨش , وحدي كبرت و عرفت لي اليد الوحدة تصرفڨ عالوجه امارة , بين العيون شرارة , باش تتربى باش تكبر باش توب و ماتوبش ..

نحب نقترح اقتراح عالمي :

ماتحبوناش .. اجري على روحك في طريقك ما تتلفتولناش ..
ما تلمسوناش , خلي فوڨ جلدنا ثلج و تحتو نار , خليه دخان حرايڨنا جهار ..

ما تقربوناش مهما ظهر علينا تعب مهما تكركبو طراف بدننا كعب ..
ما تلموناش خلونا نتفرتو , نندثرو حَب ..

ماليكم كان الشب .

ماتستغربوش بطبيعتكم هذا شنوة تحبو تشوفو ..

مَبنى نٍبني فيه سنين يترهوج , يتڨلڨل , يترنح , يزحزح , فين يطيح عليه الليل يتلوح ..

نحب نزيد اقتراح للعالم :

سيبونا , اطلقو سمانا في فضاء الكون تغرق , شيهمكم فينا نحبو نغرڨو نحن ..

انت الاجابيين السمحيين الضاويين القاريين المضخمين الغنيين المثقفين , الكذابين , لأحلامنا سارقين , لعرضنا هاتكين , في روحنا سكاكن غارسين , نوال جانينا قاطفين ..
انتم الخامجين , لي في تراكن العالم ساكينين , وين نهرب نلڨاكم يسار يمين , عيونكم تفيق الميتين و اللسانكم يوجع الحالمين , لي منكم هاربين و انتم ساكنين , ساكتين في تراكننا يسار يمين مستغربين .

__
الرحمه .

فاطمه عمري