"مريضة بريّ عديّ متمرضيناش معاك "

ما تراه تحت عيني و فوق جفوني ليس حزن؛ فالحزن ارقى من ان يشوه جمال آمرأة .

__

مخي يوجع يصطّر ، ينين .. عينيا سودها التحويق و الضحكه مزينه الخدود ..

ماهو   معادش الحزن يشدك للفرش و لا من يراعيك و يدرشك .. على خاطر المريض لازم يكون عمل عملية و الا ترفست بكرهبة و علڨ يديه و ساڨيه و الا عندو سيدا و يحسب في اياماتو .. خاطر المريض شاد التركينه يوكلو فيه و يشربو .. مايتحركش من البيت مايخرجش .

المريض في العالم متاعنا هو لي حالتو تستوجب طبيب و تدخل طبي عاجل هو نفسو لي فسرتلكم حالتو كيفاش ..

_

- " ... مريضة منجمش نكون موجودة هالفترة "

-شوفي طبيب ، شنوة يوجع فيك ؟ شلازمك دوى ؟

_

آش يوجع فياّ ؟

بظبط والله لا نعرف ، اما معادش نسمع بالباهي خاطر لي نڨلو " عاودلي شكنت تحكي " يقلي متسمعش ياخي ؟

معادش نشوف بعينيا ظلامت ..

خاطر  لي نشوف فيه من بشاعة يسود العينين ..

معادش نحس ، لا لي يحبني لا لي يكرهني.. هما الزوز مايعرفونيش ..

آش يوجع فيا ؟

مخيّ .

مخي ياسر مقلقني ؛ ما يرڨدش ؛ يبات يحاسب فيا كيفاش لتوة نستحملة الوضع .. مخيّ ڨديم برشا و وحل في العصر الحجري ؛ لا عرف يجاريكم لا نجمت نخليكم تقبلوه كيما هو .. و تعبنا من الصراع الداخلي حتى ولا صراع خارجي ..

مخيّ يعرفش يسكت و ما يعرفش لا يضحك لا يبكي .. يعرف كان يحاسبني .

مخّ راسي وجعني ؛ وصلت لمرحلة التلبد ؛ معادش يهمني في انها تتعمر و الا تخلا ..

مخي يحب يستقرْ ؛ يخرنن عليا قبل النوم و أول ما نفيق ..

آش يوجع فياّ ؟

الروّح.

روحي موجوعة ، خاطر عارفة طريقي ما منو رجوع و لاني قادرة نعليّ أكثر صوتي و لا نعرف خضوع ..

روحي تعبت ؛ من مدة تلوّج على تركينه في جسد تتكى ترتاح ؛ يزي مليت صوت النواح ليل و صباح؛ روحي تحب ترتاح ..

روحي مش حزينة ؛ خاطر الحزن إيمان و انا نمن به و مرتاحه معاه ؛ خاطرو أصدق إحساس؛ لا يتخبا لا يتأجل ..

روحي موجوعة .. و منعرفش نڨلك وينو كيفاش..

-

نعيش في حالة إسمها " سكيزوفرانيا "

" لا الإستقرار على حال " ؛ " المزاجية المفرطة حد التعب " ..

تعوّدت وليت نعيش في الإكتئاب متاعي و انا نخرج للشارع و نقابل ناس مهمين و نعقد إجتماعات و نخوض نقاشات عقلانية ، نخدم و نتقن مهمتي ؛ نضحك و نضحّك الصغيرات ؛ نلعب معاهم نعلمهم الفرحة و ننشر بيناتهم الحب ، نقابل صحابي نضحكو بالدموع و نتناقشو نتنافسو نتعاركو و نصالحو ؛ وليت نعيش الإكتئاب متاعي في حياتي الإجتماعية الجمعياتية المدنية الثقافية الترفيهية ..

و مش مقلقني الا انوّ حد ما يدري .. حد ما يراعي حد ما يحس حد ما يسأل ما يخمم ما يوزن كلامو و لا افعالو ..

كل يوم نموت ببطئ و انا نفارع فالدنيا بڨلب كلو محبة مش عارفة منين جايبتها ..

كل يوم نسمع عالاقل جملتين و الا ثلاثة تمس من تقوقيعي حول نفسي لي فالحقيقة نخبي بيه في "مرضي" .

-

جا راجل كن حيث لا أدري ؛ فرض علياّ تحدي ؛ تحديّ انو يعيش معايا ؛ يقسم المخ و الروّح و التعب ببرشا حب صادق من ڨلبو الحنين ..

ڨتلو 'نقبل التحدي' أما  راني مريضة قليّ

" خممتيش تشوفي طبيب " ؟

-

كاهو.