حيبّت في ليلة كيما هذي نهزك من حياتك نخطفك من حيوطك و نلم روحك في روحي و نمشيو .. مش مهم وين.

انت معايا و انا فيك؛ ننسى الخوف من غزرت عينيك ..

نطمان بيك ؛ و منين تشب نشب وراك .. عندك بين ضلوعك ؛ حتى فالظلمة نراك ؛ حبيت في ليلة كيما ليلة نسمه باردة و صوت الموج يضرب فالصخر يفيق المدرق من سنين ..

وين ؟

انت وين خنجيك نهزك ؛ الليلة شاهية ب روحي نودّك و تجي بنتي من دمك ❤ ..

انت وين نجيك نهرب بيك من ناسك و نباتو نغطسو في قاع كاسك ..

نشرب من فمك ضحكاتك و بيدك تكتبلي "نحبك " على ظهري ..

ياَ وجعي .

حبيت كان جيت نجم راني خبيتك في جاشي ؛ نغزرلك نهمسلك نلمسك ، نقرب نبعد ؛ نبوس الروّح  لي فيك ..

حبيت نوصلك كان هالليلة .. و لو اخر يوم بالعمر  نبدل معاك بعسلك طعم المرّ و نعيشك ؛ ليلةْ ..

نحبّك .. و الأبد معاش يهمني ؛ خاطرك مش ليا و خيالك بدى يحضر  و يغيب عليا .. و يدك معادش حاستها في يديا .. و عيونك معاش تعس عليا ؛ روحك معاش تخاف عليا .. معاش يهمني

الأبد  ..

نحبّك الليلة ؛ خاطرني غدوة نموتْ ..

نموت كي نشوف و نسمع و نحس لي قاعد يصير و من أين نجيب الفصاحه لاش نعرف نفرز كلامي و ما نفرشش احلامي المارة تتعفس تتفسخ ..  ؟

نحبك توة لهنا .. خاطى غدوة  باش نموت و نمشي بعيد ..

بعيد الي ديما نحكي عليه و نقلك توة غادي تلقاني نستنى ..

نحبك و موش باش نمثل الي انا متزنه و متريثه و  متكاملة و اكا الحديث تاع الطبة النفسانيين .. لي ديما يغزرولي بشطر عين خاطرني شطر قلبي شطر و مخي شطر و الناقص مني مشى

لعندك و انت مش عندي .. و منحبّكش للأبد  خاطرك نزوة ؛ تخيل ؟

ي نزوة قاتله تزرق بالعروق سموم و كل يوم نقول اخر يوم  ..

بارح لوجّت عليك ؛ رتبتلك روحي ؛ وجهي المزيان و بدن الفنان و روح الشجعان و انت كيف عادتك ماجيتش ي جبان.

بارح وحدي سهرت   في كاسك ؛ لوّجت عليك في كل قطرة مر ؛ مع كل خيال في وجوه الناس في صوت الي يغني في حيوط الشارع في عنق الورد الذابل ؛ لوّجت عليك و  ما لقيت كان

وجيعتك ..

بارح وحدي ساهرة نخلوض ؛ قلت رجال اخر لي انا نحبو قربت منو و بكل جرأة بستو ؛ زدت تخمّرت عنقتو ،  قتلو محلاك ي فلاان و طلع اسمك و غفصت عنايا طلع  الوجه مش وجهك و الصوت

مش صوتك و العيون فيهاش غزرتك و الريحه مش ريحتك .. اماّ انا هي انا و خيالك محاصرني من كل شيرة يتشوحر عليا .. تحب تضربني تقضي عليا ؟  

عاد انا ستنيتك و اهوكا كاسك يحكيلك و غناية " ما تتركني هيك " تشكيلك قداش سمعتها و عادت و بكيت و مالثمل بوجيعتي دخت و صحيت .. توجعت و انت كي عادتك ما جيت ..

هي ليلة حبيت نهزك نلمك نقتلك و ندفنك و نرجع نموت بلا ما نخمم فيك .. هي ليلة حبيت نختارو اسم بنتي ، نحكيلك على بوسة الرقبة  و التخديرة في حلمتي .. حبيت نحبك للأبد ..

ليلة لو باقي ليلة ..

--