Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

حبيت فيك عينيك

slam-sarah-messaoudiSarah Messaoudi - ساره المسعودي

إيجا نكتبوا على الرمل والسحاب..

نحكيو على عذاب السنين..

عالفعل المشوم الدوني.. وعالمشموم اللي ذبل..

عالوقت اللي ضاع.. وعالضربه اللي ما قرينالهاش حساب..

عالحساب اللي تحت التوته..

عالتوته المرة..

على آخر مرة ريتك فيها..

وعلى كل مرة تصرفت فيها كيني وحدي..

على كلمة نحبك عقاب الليل المدهونه بالزبده..

وعلى الزبله..

عالقطاطس اللي دايره بيها تمعوش..

إيجا نحكيو على وجيعة نصف الليل..

على السهرية للفجر..

والمخده المبلوله..

وقعدة الفيراندا في عز البرد..

عالبرد اللي هشهش العظام..

عالعظام اللي تكسرت..

عالكسرة اللي تشبع الجيعان..

وعلى حبك اللي ما يتشبعش منو..

على العرك اللي ما يوفاش..

والثنية اللي ما توصلش..

إيجا نحكيلك عالألفين عيب اللي فيك..

عالتعب بين يديك..

عالخصله الوحيده المزيانه اللي خلاتني نشد فيك..

على عينيك.. سبحانو ربي سبحانو!

قداش نشعل وتطفى ناري كي نشوف بعيني..

كيفاش رسملي في عينيك ثنيتي..

وسطرلي فيهم تفاصيل حياتي..

وعمل منك المهم..

عينيك.. قداش كبشت فيك على خاطرهم..

أما مش على خاطرهم عينين قطوسه..

ومش على لمعتهم مع التمعويش في الليل..

وقداش يشبهوا للورد..

قداش يوساعوا كي ترشقهم فيا..

تقول ورده تفتحت في الربيع..

وعلى الربيع اللي نبدا نستنى فيه وقتاش يوفى.. باش يجي الصيف..

عالصيف اللي حبيتك فيه..

وعلى البحر والسماء..

اللي نرجع ونكتبلك عليهم..

والعرق يصب..

حبيت فيك عينيك..

مش على تذبيلتهم..

ولا ترميشتهم..

أما على خاطر هاك الصدق..

اللي ما تراش في أفعالك..

وريتو في عينيك..


ساره المسعودي
حبيت فيك عينيك
Tags:

Vous pouvez lire aussi