حلمت بروحي في الماء المعكر مردومة حلمت حلمة مشومة الخير سبقتو و الشر بعجاجة أفادي علقتو بعيد و حرقتوحلمت بيك نسيتني حلمت بالدنيا تخنق فيا من صبع ساقي للڨرجومة نتڨريد في ليالي الصرد عالبيبان مهمومة نطلب يا كريم يا حنين راني مظلومة لحيمتي متاكلة و مذمومة محڨورة كلييماتي منڨورة عالشّدة تولي خرايف عاللسيينات منثورة من الجد لولدو و أحفاد صغارو منشورة و دميعاتهم تتقاطر على قلييباتهم و جرييحاتهم المكسورة يدي على يدك عالريشة مضمومة بالحبار مغمورة عويناتنا مسحورة مخطوفة و كلييماتنا محبوسة على شفييفاتنا مقهورة...

نخرج نرجع نموت نعيش نحلم حلمة منبوذة مشومة ڨرومة نحلم نطلفح نتشلوح نتملح منهم هوما و الهم يجري سواقي فالبدن كالخبز الي ما يتشراش بالفن و الكلمة الي ما تحررش الوطن و أرواحنا جوهر منبر ملفوف في قطن أرواحنا ملفوفة في كفن....

ما حاجتي بحرية اتعريني و كرامة على شباب بلادي تبكيني ما حاجتي بوطنية طينية رملية عجعاجية عتماء صماء بكماء وطنية خالية مالوطن و بركة الماكلة فالصحن والعزّ والدّلال و كثرت الهبال و هلالك هل علينا يا زمان الغلبة و الحكومة الكلبة يا زمان النهبة و السعد الراقد و الندبة و النكبة على شباب الغد و المستقبل يفدّد يركب الغدة قداش طول حبالك؟

وقتاش تتهد جبالك؟ قداش طول هالمدة؟ وقتاش توفى النكسة و الربيع يربع و نوارك يتجمع ؟ .... و دميعاتهم تتقاطر على خديداتهم و جريحاتهم المكسورة نحب نشوفك في أحلى صورة نحبك يا بلادي منصورة نحبك و نحبهم يحميمني و يحميوك هوما شكنهوما أعداء الوطن شكنهوما الي لفوك في قطن في كفن ردموك بكاوك كرتوش و العدل فيك بكوش العدل فيك ميحبوش ... يا أمجاد وين طريق الحق.. دل ظليل في الحق ضايع و فنان في مخو مايع يا طريق الحق دل بلادي للضو قريب دلها يا حق و بقمرة نورك ما تغيب نسيت الضحكة كيفاه تترسم عشفايفنا تذكرت الي محبوسة كليماتنا تذكرت روحي في الماء المعكر مردومة و حلمت بيك يا بلادي نسيتني فقت قيتك بجنبي منسية يدي على يدك عالحرية مضمومة و ضحييكاتنا على شفييفاتنا مرسومة مكتوبة بكلييمات أمجاد

أحرارك على قليباتنا محفورة بذهب معيّر و فكر محيّر و يوم منوّر تتكلم تونس حبّي الأول .........
كلمة من قلبي