Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

حاجة اقوى مني

amour-chaines-bloqueeFatma Omri - فاطمة عمري


و لا عمريِ نسيتك ..

باهي نحبك , قد رحمه ربي نحبك .. وسع الكزن و اكبر نحبك ..

نحبك قد أبشع موقف صارلي منك و اعمق 

نحبك قد الوجبعه الكل ..

قد اليُــتم الي بيا الكل ..

نحبك قد ما إنتَ خليتها بيا و قد ما انا ما خليتكش ..

باهي نحبك و نحب نحبك و نحب نعيش و نموت نحبك و منحبش ننسى حبك ..

أيه نحبك ياسر كيما ولدي لي ماجبتوش و كيما فرحتي لي معشتهاش و كيما كتابي لي ما تطبعش و كيما يديا لي ما تملش من الكتيبه ..

نحبك قد رعشت قلبي و رجفت يدي و حرقه دمعت عيني و سرعت نبض قلبي كي نشوفك ..

نحبــك قد ما بكيت وحدي في ليل بلا بيك .. قد ما سهرت نستنى فيك ..

قد ما إنت تنساني و انا نخمم فيك ,,

قد ما خذلتني نحيك .. قد ما إنتَ قصرًت معايا و قد ما انا صبرت عليك , نحبك ..

نحبك و نحب نحبك و ما نحبش ننساك و لا نحب تنساني .

قد رحمة ربي بــ الي خلقهم جميع نحبك

نحبك اكبر من قلبي و اكثر من دميِ و أبشع من جعزي اني نعيش معاك ..

نحبك قد حلمتيِ لي كلل يوم تموت .. نحبك قد فرحتي لي كل يوم ما تعيشش ..

نحبك قد ما انا وحديي برشا من غيرك ..

نحبـــك قد الناس لي دايرين بيا و منشوفهمش ..

نحبك أكثر من لي حبوني و منجمتش نحبهم ..

نحبك قد ما إنتَ خليتها بيا , اكثر مما ضحكت عليا و اعمق مما بطيت عليا ..

نحبك و نحب نبقى ديما نحبك ..

نحبك كيف ةنشوفك و نشتهي نبوسك بين اكا العينين 

نحبك كيف ما نشوفكش و تتعدى ريحتك من جنبي و لحمي يجنز ..

نحبك قد ما نسمع اسمك و يتقال و قلبي يبكش ..

نحبك قد ما تتعمد تجي في وجهي ..

نحبك قد ما تعمدت توجعني باش نبعد ..

نحبك قد ما انت تتعدم تحطمنيِ ..

نحبك قد ما إنتَ تتفخر برجولتك خاطر الوحيد لي هديتني .. 

نحبك و منحبش ننساك لازمني نعيش معاك و انت عايش وحدك .

نحبك و لازمني كل ما تجي الفرصه نقتلك و نعذبك بوجهي المزيان و عيوني الصادقه ..

نحبك و منحبش ننساك خاطرني لازمني كل ما تجي الفرصه نبكي كيف نراك باش مترقدش الليل ..

نحبك برشا ي ولد الناس الطيبين و منحبش نخليك تعيش مرتاح 

نحبك و نحب لونك و نحب نحط يدي على عيونك و نحس نبضهم ..

نحبك و نحب تجيني و تعنقني و تمشي .

نحبك و نحب روحي لي ما سكنتش فيك تسكن في سهر عيونك و في وجيعت ضميرك ..

...

تعرف ؟

و الله نحبك .. لكن مانيش باش نخليك تعيش مرتاح , منجمش , حاجة اقوى مني لازمني كل مرة نقتلك و نعاود نقتلك و نعاود نقتلك و نزيد نقتلك و نتعمد موتك و موت ضحكتك لي قسمتلي

حياتي .
نحبك و نحب نخليك كل يوم تموت و نقتل فيك الفرحة لي مكملتليش معاك ..

نحبك و نحب نفسدلك روحك المزيانة كيما فسدت فيا كل شيئ حي ..

لازمك تموت كيما قتلتني الاف المرات في الدقيقه ..

نحبك و لازمك تعيش تاعب مني و تعيش مريض كيفي  ..

نحبك و نحبك و نحبك و نحبك و نحب نعيش في حياتك و انا موش في حياتك ..

نحبك قد حياتي لي فسدتهالي و من بعدك ما عرفتش نصلحها و لا عرفت نعيشها و لا عرفت شيئ ..

نحبك برشا و من ثرت محبتي فيك عمري لا باش نسلم فيك و باب الجنة تلقاني ذنب واقفه نستنى فيك 

نحبك و لو تبكي الدم ما نرضاش عليك ..

نحبك برشا ي وليدي لي مفرحتش بيه و انت قتلتو ..

نحبك برشا قد ما انت هديتني و انا مرىَ من بلاًر 

نحبك ياسر ياسر .. أكثر مما يتصور البشر العادي ..

نحب فيك كل شيئ ..

نحب نخليك تموت كل شواية و مع كل موقف مع كل كلمة ..

نحبك و نحب نعيش بيك و ليك و معاك و انت ماكش في بالك بيا ..

نحبك برشا لدرجة اني عمري لا باش نسامحك .. لــ درجة اني عمري لا باش نسيبك تعيش ..

نحبك بطريقه عمرها لا باش تحبك بيها مرىَ ..

نحبك كيما عمري لا باش نحب حد ..

نحبك قد ما انت فسدتني و مخليتش فيا روح نحب بيها حتى روحي 

نحبك قد ما انت حطمت فيا الروحي و معادش نجم نحب حد ..


نحبك كبما انت شوهتني و خليتني بلا روح ..

نحبك قد ما انت خليتني مانجمش نكون مع حد و منجمش نصدق حد و ما نحملش يكشف روحي حد ..

نحبك قد ما عمري لا باش نخلي ضميرك يرتاح ..  

نحبك و شاهية نبوسك من عيونك و بوس لعيون يفرق ..


نحبك و شاهية نقلك هي ايجا لعندي نعيش بيك شواية و بعد عاود اقتلني و رجعني لموتي ..

نحبك و شاهية تجيني و على غفلة تقلي : فاطمه ابعديني اخرجي من راسي و من حياتي راني منحبكش  ..

ايه شاهية تجيني تو انا نتصرف وحدي

____________

ليك و عمرك لا كنت تستحق حرف 

___

فاطمه عمري
حاجة اقوى مني
Tags:

Vous pouvez lire aussi