توحشتك و مانيش بش نبشبش بيك ،

توحشتك ويلعن بو لوحش اللي خلا جواجيا نار تكوي وتليع منك و ليك ،

توحشتك وتوحشت ضحكتك ،عينيك ،وبوسةالخالة لي في ايديك،

توحشت القهوة المرة مي ايديك الحنان،

توحشتك وقت تقرالي لي كتبتو بصوت عرفت شمعناها حنية ،

توحشتك في وقت الفايس و التويت تكتبلي،تشعرلي في زمان لاعاد فما لا القباني ولا درويش ،تخبيهالي تحت المخدة ،بش كي نقوم الصباح نقراها ونطبعلك بين خديك بوسة تنسيك وتنسيني فاللي فات ،

توحشت الشوميز الكحلة عليك والسروال المفخفخ وصدقني ما يطلعو كان عليك ،توحشت الشتاء ،والشتاء ما يحلى كان بيك ،انا ،انت ،صوت المطر والشمينية مونستنا ،توحشتنا ونحنا نطلفحو في المدينة وزناقيها ،نجرو ،نضحكو ،بهبال تصورني ،تحملني ،نترنخو تحت المطر تي قلهم ينحيو سحابتهم ويشاكونا فرحتنا،

توحشتك بمرجك،بغيرتك ،خوفك و غشك مني وعليا ،

توحشت عيني كي تلمع وقت نلبسلك الروبة الحمراء نقلك سكرلي السلسلة ومتشدش روحك بش تطبعلي بوسة ،بوسة تقشعرلي بدني وتهزني لسابع سماء ،

توحشتك وتحشت ريحة الياسمين عليك ،

توحشت الليل معاك ،

توحشت خرافاتك ،تحت السماء نسهرو نعدو في النجوم هاذي ليك وهاذي ليا ،

توحشت الحنين و الغالي توحشت روحي البعيدة . بلا بيك ،توحشت سماك ويلعن بو الدنيا بلا بيك .. توحشتك