توحشت القمرة

و توحشت الكلمة و الغمرة

توحشت النجوم

و القلب حزين مهموم

و خطي المشوم

و الليل و الياسمين و تخلويض حرف على قلم يلوم

توحشت القمرة

توحشت الغيمة و الخيمة و السكرة و التبسيمة

عقاب الليل و دورت المدينة

و انتي شهوة و لهفة و بوسة على غفلة

توحشت يد و قرصت خد

توحشت بحر على رملو نتمد

توحشت موجة و شدت ريشة و فوشة

و انتي كتيبة على سدري منقوشة

و البعد يلعنو و يخزيه

و بالي بخيالك و تصاورك معبيه

ايجا نحب نضيع فيك

من راسك لطراطش ساقيك

و شوافر العين بالشفرة بالشفرة في سماك تتطاير

و انا جايك عتبت بيتك زاير

الدنيا كحلة و نرا في دواير

مخنوق و نحب نفس

هات نفس

و خليني على هواك ساهر نعس

ردبالك تغفى ولا تهزك عينك و تنعس

و همس الليل كي في وذني يهمس

و يهرب يتسرسب مع الحيط كنس كنس  

خنڨة و غصة و فرڨة و مازلت نستنى  في نهار الملڨا  و السماء ماعادش زرڨة من وحشك تعبات غيوم

و هاك الطفل على الأرض يهوم

فيك  و لا سرّك وريحة عطرك

و الظفرة من شعرك

بيك و فيك  يهوم و الدنيا بمطر سمايا على قريب بش تعوم و تتمحا الهموم بعد ماشاح الريق و تنسى الطريق و مالغل فاض الواد

هب الريح و طار الرماد

نحب نفيق

توحشت اليڨضة يزي مالاحلام

ايجا نمسك و نشد يدك و نحسك

توحشت ڨمرت تسعطاش قد وجيعت محتاج مد يدو و ماخذاش و قد ندم واحد ماعطاش

و انتي الداء و الدواء

الاصل و المفصل

و الحكاية و النهاية

الصدر و العجز و الازمة الشعرية و الكلام من سرّك عجز

و العكاز يبس

طبيب و نبضك نحب نجس

توحشت موجة و شدت ريشة و فوشة

ڨمرة