بين المنامه والدنيا

Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

Sarah Messaoudi - ساره المسعودي

على قد ما لوجت على ثغره..

على قد ما ذبت من غزره..

على قد ما طاحت من شوافري جرة الدموع شفره..

درت ودرت وشبعت من التراكن وعملت من التصاور ألبومات..

وفي عوض ما نشبع من حكايه عشت حكايات..

بلعت ريقي ورجعت سرحت، ولا هزيت في زادي لا ماء لا دواء..

وبالداء بالداء، خلطت لتركينه داواتني..

داواتني ريحة السكات ونسمة الوحش في عز ليالي التمرميد والعذاب..

وسكرت من القعده وحدي..

ولا طاح من يدي الكاس ولا تجرحت صوابعي..

تجرح خاطري وضاق..

رجعنا للحكايه منين بدات..

نسمه وشعر طاير وقلب حاير مدمدم متهري ذايقهم ألوان..

وقوس قزح مرسوم على خيال السماء عاطيني ألوان نلون بيهم الرماد.

وتمرمدت..

كي حال البنيه اللي ما قراتش حرف.

كي المرا اللي بنات منو راجل وكلات منو كف الصبيه المسراره اللي في ٱخر العمر جات.

كي قلعة الرمل اللي بنيتها على حافة الشط وجات الموجة هدتهالي..

كي الحلمه اللي عندي ياسر ما عنقتهاش..

وكي صوت البرق..

وريحة التراب بعد المطر..

كي قلبي اللي عييت نقري فيه..

وما فهمش..

كي روحي اللي ضيعتها في ثنيه ما مشيتش فيها بكيفي..

وكيفي اللي فسد..

وكتيبتي اللي حروفها ولات حزينه..

وغنايتي اللي ما تونسني كان هي..

حفظتها.. غنيتهالك..

كي الكتب والأفلام اللي تفرجت فيهم..

وجيت نمثل في دور معاك..

كي الفرق بين المنامه والدنيا..

كي الحلمه اللي عمرها شمعه..

مع أول ريح تطفى..

وذكرني تعمل مزيه،

آش قال هاك الشاعر؟

"العصفور يموت.. وإنت تفكر قداش طار."

ساره المسعودي

Website Design Brisbane

Tags: