انتي جنة اما ترابك نار

Lina Khattat - لينا خطاط

انتي جنة اما ترابك نار..

و حر نار ترابك كاويني..

نحب نفهم شلزني عليك.. شبيني مش منجمة نعاديك..

شبيني متعلقة بيك.. علاه اصلا نحب فيك..

بالك خاطر معذبني و القطوس ما يحب كان خناقو..

ولا بالك انا الوحيدة الي شفت الي ما شافوشو الناس فيك..

زعمة كان أنا شفتك حنين؟؟

ولا نستخايل !؟؟

لا بالك خاطر حليت عيني فيك..

و قطعة مني حسبتك..

بالك خاطر حسبتك ولدي و قلت نددشو لين نوصل بيه ل الثنية..

وليدي الي دفيتو بحر جواجيا و سقيتو من ريقي و كبرتو و عليتو..

و من يديه شديتو و ددشتو بشوية بشوية...

شادتلو إدو و نمشي فيه ورايا..

تحملت الدعثيرات في ساقيا باش يلقى الطريق حرير من غير حجر ..

ما حسش بتعبي و ساقيا الي كلها دم.. و كل ما يسإلني نقلو صحيح الطريق أحمر دم اما اذاكا الكل مالحر..

و هو في الحقيقة قلبي الي ذاب من كذبوو و تبهنيسو و دور الضحية الي ديما حاط روحو فيه..

عندي برشا نكذب على روحي و نقول وليدي مش هكا .. وليدي قطعة مني اكيد مش كيما يقولو عليه الناس..

أنا نرى فيه بقلبي و هما يراو يعينيهم..

حتى انا ريتو بعيني اما عميتهم و قلت قلبي أصدق..

كذبت و في بالي الكذب ينجي كيما يقولو و صبرت...

طال الزمان و فمهت الي لا الكذب ينجي و لا الصبر يحجج..

تصويرتك ديما بين عينيا كل منثبت فيها نحسك تعاتب فيا كينك انتي الضحية...

تبدا درا كيفاه تخزرلي تحسسني الي انا مخيبني مسقتني!!

و الي انا بلا بيك باش نطيح في الضلام...

و نطيح و نقعد نستناك لين تحن و تجني بضو عينيك باش تخرجني و كي نراهم من بعيد نجيك نجري

وقتها بلحق نزيد نحس روحي مذرحني و مسقتني و مرخصني...

امااااا...

عندي مدة كل مرة نطيح في الضلام ونقعد نستنى نستنى نستنى نستنى....

لين نرا الضو.. نمشي نجري اما ميطلعش ضو عينيك.. و جنة الي في بالي انتي ماﻷول مطلعتش انتي...

الجنة كي نجمت نطلع مالضلام وحدي... تشعبط و تجرحت و طحت و قمت اما في اﻷخر نجحت و لقيت الضو..

مش قتلك راك الجنة اما ترابك نار..

أما الجنة مافيهاش حر.. زعمة شنوة انتي من هاذا الكل....

لينا خطاط

Website Design Brisbane