بعد الانفصال الأخراني , على ما أظن ..
" مانعرفكش راني " ..
نحب نخرج نتمشىّ على الكياس عالبحر بجنب الشجر فوڨ التراب , فوڨ الماء , فالخلاى ..
و كيف نتعب نتكى على أي ساس , نحب نمشي ماغير وجهة و ماغير على بروڨرام , نمشي و كهو  ساقايا يعرفو الطريق الي ما ترجع و مخي يعرف الطريق الي موش صعيب و ڨلبي ما عندوش دليل .
نحب نتمشى وين يطيح الليل نبات و نعشش الخيمة و نفرش الأوراق البيضا و نتوسد زندي و نبقى ما نروحش .. نحبك تمشي معايا تعرف تمشي و ما تتكلمش ؟
نعرفك متنجمنيش .

نحب نتمشى و انت بجنبي , كان خطرلي  اليد فاليد , نحط الكيت و نسرح مع روحي لروحي تلقاني نسمع في
" وين , مشيتي و خليتي ڨَلبي حزين ... "
ممكن نسمع في " ما تبكيش , ڨولي هذا مكتوبي .. "
ينجم يكون " اسمع يا نجوم و تبعني , انا نحكي و انت اسمعني .. "
و انت بيديك تبعني اسمع موزيكا لي تحب علييها و تلذذ المشي  ..
نعرفك متنجمنيش ..

نحب نمشي في الظلام و نخاف و يرعش ڨـلبي و نتمم بكلام لا مفهوم سب لا ملام , (وليت نخاف بعد ما رعبتني و ماسمحتكش عليها  ) .. هذا هو لي صار ..
نحبك ما تنجمنيش ..

نحب نلبس الغامق و انا شكلي بطي موش طولي فائق , كپيش و دجين و الرقبة معريا و زيدهم الوذنين بلالط كحل معلقين و شركة الـــ "عشق "  متربعة الوريدين .
اخر مرة وشمتك في صدري و خليتك أمارة و بالمناسبة  لعنة الله على نفسي  ما كيفهاش امارة بالسوء ..

نحب ناخذ كتابي " شرع الحب " لـ فاتن لي بديت فيه عندي أربعة شهور و لتوة لا نحب نسيبو و لا نحبو يكمل و نتكى على حافة الكاناباي و نرشق ساقايا فالسقف باش وين نهز راسي من الكتاب نشوفهم (ماهم هوما ثاني ازين حاجة في عينيا بعد الراجل لي حبيتو )

على ذكراه ..
( وجهو يشبه لكل قطعة نور فالسماء لكل حبة شوكولا فالمحلات لكل مكعب سكر في الدكاكين و كل نقطة عسل فالنوار و كل نسمة ترد الروح في البحار و لكل حرف فالمذكرات المرهقات الصغار و لكل دمعة مشتاق محتار و لكل همسة حب بين زوز احرار و لكل قبلة سرقة خوف من عينين النهار و لكل تعنيقة روح بين العشاق الكبار ..
وجهو يشبه لدوى الاعصاب و حلوى الصغار و كسوة العيد نهار العيد الصباح و عيون الام في كل مرة يزور صغارها النجاح , يشبه للأبدية فالهيام و الفترة الأولى و الاعجاب , للغزرة بالسرقة و البوسة باللهفة و اليد و الرجفة و وجيعة الضمير فالمعدة .. وجهو يشبهلي من داخل . )

قبل النفصال لازمني نقلكم بأنني أُصبت برجلٍ يحب الماكلة اكثر من حبو للورد   "عايزة ورد يا إبراهيم و متقليش كيلو الكباب ارخص منو "  
.. يوزن فوق المئة بطنين , يرتدي عيوبه و يخبأ محاسنه , و اش مزال من محاسن بعد هذا , قصير القامة طويل اللسان , ماكانش يبخل باش يعبر على رأيو في أي شيئ الا في أي حاجة تخصني خلينا نقولو "تخصنا" (رغم ماكانش يجمعنا الا الدين و الفرش ) .. و الا في كيفية تطييب الدوارة و المسلان و الكسكسي بالسمان ..
على فكرة يكذبو الي قالو "اسهل طريق الي قلب الرجل معدته " خاطرو كانلي اخطر طريق , استسهلت قتلو و دفنو ..

لالا ما ماتش فالدنيا مازال حي الله اعلم في أي بر و لكن الأكيد انو في كوجينا و الا مطعم عربي تونسي في احدى شوارع العاصمة ..
يعني نقصد فكرة اني نتخلص منو كانت ساهلة طريقو ساهل .. على هذا السياق خليني نحكيلكم عليه :

رجُل ثلاثيني .. لا يفقه الحاء من الباء , على ما اظن انو مادخلش للمدرسة بسبب حاجات منعرفهاش , لكنو يخدم مع بحارة من الصين يحكو الإنجليزية عاد اتقن لغة الكفار فيسع فيسع ’ سريع الاستعاب هو ..

أنيق المظهر ، كل وين نراه خارج نحسو الليلة عرسو من كثر لهوتو بروحو فاللبس و البرفانات الي ما تتسماش في تخبيصها على بعضها , ما يبخلش باش يكون مميز شكلَا و جذاب على حسب ذوق البعض يعني ..

راجل حنين , صبور , كريم , صاحب أموال طائلة , صاحب صاحبو , عندو في الذوق ما يقول (ذوقان الماكلة) .. سافر اكثر من 80 دولة و تعلم برشا لغات رغم انو امِّي تعليم الكراسي من برا و حقود و غيور و مشكاك و قاري نقص في روحو و يحسبها برشا و مشحاح من داخل ..

عندو ضحكة حلوة جذبتني ليه و تقربت منو الاصح خليتو يتقرب مني , خرجنا ضحكنا حكينا و يا ريتنا ماحكينا خاطرو محلاه و هو ساكت ..
ممكن العطب فيا انا لكنو ماخذ منحى "شبيه بالعديد " يحكي في أمور يجهلها و يناقش و يعطي معلومات سمعها في جلسة خمرية كل الي قاعدين معاه مايعرفوش طريق دارهم وين يڨبـّل , يحكي فالدين و الفقه و سيدنا علي نبي الله و محمد رسول عظيم و الرجال قواّمون على النساء و المرى كائن ضعيف و مكسور الجناح و الراجل البلاتر و الا الجبس إلي باش يجبرها يلمها .. يبرتاجي كل اخبار الغير مهمة و يسمع أي فيديو متعدي قدامو ..
يكسب ثلاثة تاليفونات واحد للخدمة و واحد لأصحابو و لاخر للعائلة , مفتاح كرهبتو المنعرفش نسميها ديما ضايع باش ديما يلوج عليه في أي مكان باش يفكر الحاضرين لي هو عندو كرهبة شاراها بسوم دار في سيدي بوسعيد .. موش بنية خايبة عاد ..

راجل ما يفهمش فالرومنسية لكنو يحب يشري الكادوات برشا و يحب يدللني و يشيخني بالشيئ و كذا كل شوية بمناسبة او غير , المهم اسكتي و ما تسألينيش وين كنت و مع شكون , و انا ما نسألش , لكنو ديما يوسوس خاطر في طبعو مشكاك ..

يكره صحابي البنات و يحب صحابي لولاد .. كل افكارو ذكورية بحتى ماغير تفسير عقلاني و انا انثى االجدي (عقلانية للرب) ..
يكره شكلي المربع و يحب كيمكرداشين و هو أصلا ما يعرفهاش الا في تصاور الاستغرام .. ممكن خاطرها متاحة في أي وقت يشوف اشيائها لكن انا كنت " متمنعة" لا لي شيئ غير انا ماحبيتوش .
راجل ثمانيني الفكر و ساعات يضرب يجي في 2060 .. هو و نوعية الكاس الي يشرب فيه ..

جنسيتو تونسية و عاش فالصين فترة كبيرة من حياتو , اصو الأصيل مايتعاشروش جدو الأول كان كلب .. هو عاد متبري منهم و الا هما تبرو منو تقريب المهم انا منعرف عليه شيئ غير المعلومات هاذم عرفتهم في سكرة من سكراتو .. اخر الليل مع ضو الفجر توسد الركبة و بدى ينحب على اصلو و فصلو


و اش هزو يعيش البرا و حرمانو من الحنان الام و الاخوة و اللعب في التراب و التمرميد في تونس بأشكالو .. كل مرة نسمعو لين يرڨد ، نعنقو و نغني لروحي " بكرى يخلص هالكابوس .." ..

على ذكر الجنسية , ماكانش خايب فالجنس و الدلال و الفيانة و الهبال , لكن انا الي ماكان يحلالي شيئ منو لو يزنوه بالمال , يراعيني و يسايس فيا يواسيني و كيف دور بيه بنت الكلب ينجم يغصب عليا روحو و ياذيني ..
انا الي " شاهية و نكص " ؟ لا , ما شتهيتوش ولا مرة و يظهرلي ما غزرتلوش جملا ..
نحكيلكم سر ؟ ماعمري جذبني جنسيا حد بعد الي وجهو كي ضو القمرة نهار اربعطاش و كيف يشرق يبقى نورو واصل لبعد الكورة الأرضية مايوفاش .. ياريتني رمش و نسكن وجهو .

- ما تتصدموش هذي حياة ممكن 60% من النساء . -

انا مرى تكتب , ممكن هذي هي اللعنة الوحيدة الي تصيب الي شخص يدخل لحياتي لأني قادرة نصنع من نص يكونلي سبب نجاحي و تفوقي في مجالي , ممكن يكون مجرد نص نسيت وقتاش كتبتو و علاش كتبتو ..
انا مرى نحب نتمشى ماغير سبب و كيف نتعب نفرش روحي نتمد .. من بساطتي حد ما ينجم ينجمني .
خيالي الواسع يصورلي احداث ما تخطرش عالبال و يرسملي حديث ما يتڨالش ..
انا كل الي نعمل فيه من سنين اني نبكي و انتم تشوفوه نص و يمسكم و يسعدكم و يمكن يحزنكم , ساعات يبكيكم .

" انا زادة كيفكم يوجعني كلامي " ..

___