النساء كالقطط.. يقعن دائما على قوائمهن..

Notice: Undefined variable: relatedArticlesCount in /home1/datalyz/public_html/tounsia/plugins/content/tags.php on line 149

Oumayma Karoui - أميمة قروي

ما تبكيش.. ما يواتيكش..!

أضحك ينعمبو لي فسدها..!

أضحك معاهم و أضحك عليهم..

غني.. غنيلهم و غني عليهم..

إكتب.. إكتبلهم.. وآكتب عليهم..

عبر.. صور.. أقرا.. تثقف..

بش كي تحكي معاهم توقفلهم مخاخهم، موش.....

تي لا علينا..

المهم وصل صوتك.. وصل رايك..

أعمل كل شي بطريقتك.. خلي بصمتك.. و لمستك الخاصة..

ما تشبهش غيرك..

تجرأ.. تجاوز العباد و الحدود إلي يحطولك فيها..

الحدود تخلقت بش نتجاوزوها..

إسمعهم و ما تسمع كلام حتى حد فيهم..

أنصحهم الكل بصدق كان احتاجولك ..

و كان وحلت ما تعملش بنصيحتهم ..

كون "مختلفة" قد ما تقدر ..

و يكون في علمك بش يراوك "متخلفة" ..

و ممكن ياسر "مختلة" زادة..

ريت كيفاش حرف واحد ينجم يأثر على رايهم فيك ؟

ريت شيعمل حرف موش في بلاصتو ؟ يقلبهم..

ملي كانو معاك يوليو ضدك..

نحبك تتملح منو الحرف هذاكا..

خاطر على قد وعيهم ومعرفتهم بيك بش يشوفوك..

على قد محبتهم و عداوتهم و ممكن غيرتهم زادة بش يشوفوك..

عادي.. مختلفة، متخلفة ولا مختلة.. عادي..

و كان حكاو عليك، غنيلهم.. " خلي يقولو آش يهم، إلي يشكر ولا يذم "..

و كان قالو بيها و عليها زيدهم بصوتك " كي ما وصلتوش للعنب قلتو عليه قارص "..

و كان طحت.. نحبك خفيفة..

كي القطوسة..

تجي واقفة على ساقيك..

و ما تخلي حد يتعدى و يعفس عليك..

بقلم أميمة قروي

Tags: