Amel Trabelsi - آمال طرابلسي

نحب نموت

نحب نموت ...

نحب يتخنق في وسطي الصوت...

نحب نشوف وجهي في المرايا خطوط ...

ما نحبش نعيش لغدوة .. ما نحبش نفوت ...

ما نحبش نشوف خيالي معكوس عالحيوط..

نحب نموت... نحب نموت...

ما تلحفونيش بالأبيض.. أرموني للحوت..

البحر موالفني... ياما دموعي عبات شطوط...

ما تبكاوش عليا .. قولوا مالا راحة من هالرهوط ...

ماتقراوش عند راسي القرآن ... خلي عند راسي يتربى العنكبوت...

أزبروني كي زرعتوني كرموس طلعة شجرة توت...

جيبو إرهابي و قولولو هذي زعيمة الطاغوت ...

بالك يكبر قدامي و يجبد الخيط و نموت...

الليلة قوية عليا هربت للستيلو نعرفو يسمعني من غير شروط...

الورقة تفهمني من غير مايطلع من فمي الصوت..

مستغربة مني ورقتي ... مالفة بيا ننحت الفرحة عليها نحوت.. عرفتني الليلة ضعفت ... سمعتني ناديت الموت...

شافتني نغني في لحن مخنوق... بعد ما كنت نغني وقت الشروق...

مرايتي بكات معايا... واستني بكلمة كل شي يفوت....

رجعت عليها نحب نموت...

ورقتي من يدي طاحت ما توجعت ... وما صاحت.. ما مشاتش مع الريح ما ماحت ...

وردتي الليلة ما زهرت ما فاحت...

الليلة الألوان في عينيا بلاحت ...

عروقي مالدم شاحت. .

راسي يزنزن ... رزن ...كي ضربتو عالحيط فارغ رن...

حاجاتي سئلوا شبيني ... سئلت معاهم شبيني ... أي زعمة شبيني ...ضعفت و طلبت الموت و ما خفت... لا حنيت بروحي ما روفت... كسرتها مرايتي كي وجهي شفت...

زعمة شبيني ذبلت ... قالولي الحب عمل فيك أكا...

قلت لا.. لا الحب خاطيه أنا إلي تبدلت... ... الحب سقاني كي شحت ... قواني كي ضعفت ... الحب فرحني وبيه ليالي كتبت...

بالكشي أنا خرفت ... تمنيت الموت و ما خفت وأنا لي معروفة خوافة .... من روحي من إسمي .. حتى مني أنا... كي نشوف روحي في الظلام عريانة ....

عاود رجعلي الصوت ... في وذني يقلي موت...

يقلي إغرس شجرة توت... تحت ضلها و موت

نحب نموت ...

نحب يتخنق في وسطي الصوت