كيف نكتب على روحي منلقاش روحي و نفقد السيطرة على مداركي و نولي نهلوس .. علاش موش قادرة نرسم ذاتي لي عمري لا خبيتها ..

وصلت لمرحلة محرجة برشا من الوقاحه مع روحي .. معاد شيئ وقفني و لا شيئ يبدلني و لا شيئ يخوفني و لا شيئ يعنني ..

على فكرة هذي حاجة مرو برشا و طعمها حنضل في ريقي .. حاجة خايبه برشا اني نفقد لذة الحاجات و رهبة المغامرات .. حاجه خايبه برشا اني نفقد الخوف من الحكايات .. إحساس يخيليني باردة برشا في كل شيئ .. اي باردة و شفافه و بلا طعم ..

موش باش نفرح و موش باش نحرزن مرة اخرى و موش باش نحس ب شيئ جديد خاطرني معادش يعنني شيئ .. ممكن جربت انواع الوجايع الكل و انواع الصدمات الكل و اطياف الطبايع و الشخصيات الكل لين سايي معاد حد يأثر فيا و لا يعنني .. معاد شيئ يحركني .

و اوسخ شيئ ممكن يصير الي الراجل لي باش نعيش معاه تحت سقف باش يكون اتعس إنسان في الكون ..  رغم انو باش يكون مثماش شكون ااوفر حظ منو بيا و الدنيا بناسها بحيوطها باش يحسدوه عليا .. باش يعيش رحلة عذاب طويلة عنوانها المزاجية .. باش يظر برشا ليالي يبات وحدو في فرش بارد باش يظطر برشا مناسبات يتواجد فيهم وحدو على خاطرني لاهية نقرى في كتاب منحبش نخرج .. باش يظطر برشا يسكت و ما يتكلمش خاطرني لاهية نكتب منحبش نسمع حتى شيئ .. الراجل لي باش يقسم معايا فرشي باش ناخذ منو راحت بالو و صبرو .. باش يتجبر قداش من مرة يلوج عليا في وسط الفراغات تاع المقاهي الادبية و امواج البحر الغاضبة .. باش يتجبر يفركس عليا ليل و نهار بين اوراقي , باش يعيش رحلة معندهاش مرسى و لا نهاية .. رحلة تبدى وقت انا نقرر و عمرها لا توفى .. الراجل لي باش يشاركني الزواج يمكن يشاركني كان المكان و الزمان و الهوى ..

إلا إنني ممكن نحرمو من عقلي و قلبي و خاصة جسمي .. ممكن نحرمو من جيناتي و أنوثتي الصاخبة ..

ممكن برشا يقسم معايا كل شيئ إلا برضايا و انا منرضاش .. الراجل لي باش يقسم معايا حياتي منحبش نقسم معاه حياتي ..

منحبش نضر حد و منجمش نعاشر حد و منحبش نعيش مع حد , خاطرني منعرفش .. منجمش .

علاش لازم يجي انشان يخلص فاتورتي إعاقاتي الفكرية و الجسدية و الحياتية ؟

علاش لازم يجي شكون معايا يقسم معايا طباعي المتبلدة و شخصيتي القاسية و جسمي المريض .. علاش ؟

الراجل لي باش يقسم معايا حياتي هو نفسو اكا أتعس إنسان في الكون هو نفسو لي الدنيا كلها باش تحسدو عليا هو نفسو لي باش يدفع ثمن العوج إلي بيا ..

هو لي باش يتحرم من نوم الليل من حيرتو فيا .. و من غيرتو عليا و من إشتياقو ليا و انا معاه في نفس سقف الدار الي في عاداتنا الشرقية المتخلفه هو بيت الهناء و عش الزوجية لي عمرو لا باش يشوف لا هناء و حياة زوجية باش يشهد على دموع راجل و موت مرىَ فرضت عليهم الضروف إنو تجمعهم دار و يفرقهم قلب فيه ثالث  ..

الراجل لي باش يقسم معايا الدار .. باش يسهر ليلة عرسنا للصباح يستنى فيا نغزرلو و نحسو .. باش يبات يتحسر علياَّ و على اليأس لي يتكلم في عيوني .. باش يسهر على طرف قدمي يتوسلني نبطل على البكى في سكوت .. الراجل لي باش يقسم معايا فرشي باش يشيح و يتعب و يتعذب بيا و معايا و من خﻻلي ..

باش يلوج على حلول لحزني في كل أرجاء الكون باش يبحث في كل الكتب النفسية و الطبيه .. باش يكفر و يدورها عزام و كتاب و سحار .. يلوج كيفاش يفهم سكوتي و جمودي ..

الراجل لي باش يقسم معايا الدار عمرو ﻻ باش يكون بو صغار .. هذي الجريمة في حق تنسان جديد منحبش نشاكر فيها ..

الراجل لي باش يقسم معايا حياتي باش نعنقو و نبوس عيونو و نترجاه ما يجيش لحياتي و ما يحبنيش و ما يعرفنيش .. باش نتوسل ل ربي ما يخلقوش